आई-वडील बघत होते खेळायला गेलेल्या एकुलत्या एक मुलाची वाट; फोन येताच फोडला टाहो

नागपूर : भरधाव कारने सात वर्षीय मुलाला चिरडले. ही दुर्दैवी घटना मंगळवारी दुपारी अडीच वाजताच्या सुमारास वाडी बायपास रिंग रोडवर घडली. वंश विकास तिरपुडे (जगदिशनगर), असे अपघातात मृत्यू झालेल्या मुलाचे नाव आहे.

हेही वाचा - शीतल आमटेंच्या मृत्यूला एक महिना पूर्ण, शवविच्छेदनाचा प्राथमिक अहवाल आला समोर

पोलिसांनी दिलेल्या माहितीनुसार, विकास तिरपुडे हे एमआयडीसीतील एका कंपनीत कामगार आहेत. त्यांचा एकुलता एक मुलगा वंश हा मनपाच्या सातव्या वर्गाचा विद्यार्थी होता. तो मंगळवारी दुपारी अडीच वाजता मित्रांसोबत फिरायला गेला होता. तो वाडी बायपास रिंगरोडवरील अभिनंदन ट्रेडर्ससमोरील रस्त्याने जात असताना वंशला अज्ञात कारने धडक दिली. अपघातानंतर वंश गंभीर जखमी झाला. त्याला नागरिकांनी खासगी रुग्णालयात दाखल केले. मात्र, डॉक्टरांनी त्याला मृत घोषित केले. याप्रकरणी एमआयडीसी पोलिसांनी कारचालकावर गुन्हा दाखल केला असून त्याचा शोध सुरू केला आहे. 

हेही वाचा - चिमुकल्यांच्या पाळण्याजवळ सळसळताना दिसला भला मोठा साप, मांजरींनी पंजाने केले ठार

सीसीटीव्ही फुटेज ताब्यात -
अपघात झालेल्या रस्त्यावरील पोलिसांनी सीसीटीव्ही फुटेज जप्त केले आहे. तसेच काही दुकानातीलही सीसीटीव्ही फुटेज ताब्यात घेतले आहे. फुटेजवरून अपघात करणाऱ्या कारचा आणि चालकाचा पोलिस शोध घेत आहेत.