शिक्षक २० जुलैपासून होते कोरोना सर्वेक्षणाच्या कामात; २० सप्टेंबरलाच आला मृत्यू, तीव्र पडसाद

नागपूर : कोरोना सर्वेक्षणात कार्यरत असणारे शिक्षक यांचे बुधवारी (ता. १६) निधन झाले. कोरोनाबाधित झाल्यानंतर ते वानाडोंगरी येथील लता मंगेशकर रुग्णालयात उपचार घेत होते. शिक्षकाच्या निधनामुळे शिक्षकांमध्ये कोरोना सर्वेक्षण कामाविरोधात पुन्हा तीव्र प्रतिक्रिया उमटणे सुरू झाले आहे. याशिवाय शिक्षक संघटना विविध मागण्यांसाठी आक्रमक झाल्या आहेत.

मृत शिक्षक हे हिंगणा रोड येथील बालाजी हायस्कूल येथे कार्यरत होते. कोरोना सर्वेक्षणासाठी मोठ्या संख्येने शिक्षक २० जुलैपासून काम करीत आहेत. मागील आठ दिवसांपासून त्यांची प्रकृती बरी नव्हती. त्यांना लता मंगेशकर रुग्णालयात दाखल करण्यात आले होते. उपचारादरम्यान त्यांची प्रकृती खालावली आणि बुधवारी पहाटे चार वाजताच्या सुमारास त्यांचे निधन झाले. कोरोना सर्वेक्षणात सहभागी असलेल्या शिक्षकाचा हा जिल्ह्यातील पहिला मृत्यू आहे.

हेही वाचा - प्यार दिवाना होता है! टिकटॅकवर झाली ओळख, घेतल्या आणाभाका आणि...

मृत शिक्षकांच्या कुटुंबीयांना कोविड योद्धा योजनेअंतर्गत सरकारने ५० लाख रुपयांची मदत करावी. त्याचप्रमाणे कोरोना सर्वेक्षणाच्या कामातून शिक्षकांना तातडीने मुक्त करावे, अशी मागणी शिक्षक संघटनांनी केली आहे. कोरोना सर्वेक्षणासाठी शिक्षकांच्या सेवा अधिग्रहित करावयाच्या आणि ते आजारी पडले की त्यांच्याकडे दुर्लक्ष करावयाचे, असे शासनाचे धोरण असल्याची टीका राष्ट्रवादी शिक्षक संघाने केली आहे.

खाटा आरक्षित असाव्या

सर्वेक्षणाचे कार्य करणारे शिक्षक आजारी पडल्यास त्यांच्यासाठी रुग्णालयात खाटा आरक्षित केल्या जाव्यात, अशी मागणीही संघटनेचे राज्य उपाध्यक्ष पुरुषोत्तम पंचभाई, विभागीय सचिव बाळा आगलावे, अध्यक्ष खेमराज कोंडे यांनी केली आहे. याशिवाय विदर्भ प्राथमिक शिक्षक संघटनेने मिलिंद वानखेडे सरांच्या नेतृत्वात मुख्यमंत्री व अर्थमंत्र्यांना विभागीय आयुक्तांमार्फत बुधवारी (ता. १६) दिलेल्या निवेदनातून करण्यात आली होती.

जाणून घ्या - सत्तावीस वर्षीय युवक स्मशानघाटासमोरून गाडी ढकलत घेऊन जात होता, पुढे...

ई-मेल संघटनेला प्राप्त

शुक्रवारी (ता. १८) मुख्यमंत्री व अर्थमंत्री यांनी निवेदनाची दखल घेतली आहे. अपर मुख्य सचिव, शालेय शिक्षण व क्रीडा विभाग व आरोग्य विभागाकडे पुढील कार्यवाहीसाठी पाठविले आहे. तसा ई-मेल संघटनेला प्राप्त झाला आहे.

संपादन - नीलेश डाखोरे