सावधान! स्क्रब टायफस पुन्हा आला; उपराजधानीत आढळले दोन रुग्ण

नागपूर : स्क्रब टायफसच्या आजाराने २०१८ मध्ये ३३ रुग्णांचे बळी घेतले होते. तर २०१ रुग्ण आढळून आले होते. नववर्षात उपराजधानीत दोन जणांना स्क्रब टायफस असल्याचे आढळल्यामुळे वैद्यकीय वर्तुळात खळबळ उडाली आहे. मात्र, महापालिकेचा आरोग्य विभाग नेहमीप्रमाणेच सुस्त आहे.

दोन रुग्णांपैकी एक रुग्ण काटोल रोड येथील हनुमाननगर (वॉर्ड नंबर १) तसेच दुसरा रुग्ण चारगाव शिवापूर येथील आहे. दोन्ही रुग्णांवर महापालिका हद्दीत उपचार झाले. जिल्ह्यात २०१९ मध्ये २१ रुग्णांसह भोपाळ, इटारशी आणि भंडारा येथील प्रत्येकी एका रुग्णाचा समावेश होता. उर्वरित सर्व रुग्ण नागपूर जिल्ह्यातील होते.

अधिक वाचा - टिनाच्या शेडात पाच मुली, माय आणि आजी, चार महिन्यांपासून नाही अंघोळ

२०१८-१९ मध्ये ऑगस्टमध्ये नागपुरात सर्वाधिक रुग्ण आढळून आले होते. एकट्या नागपुरात गतवर्षी १०० रुग्णांची नोंद झाली होती. तर सहा रुग्णांचा मृत्यू झाला होता. या आजाराचे मुळ शोधून काढण्यासाठी नागपुरात दिल्ली येथील राष्ट्रीय रोग नियंत्रण केंद्राचे (एनआयसीडी) पथक आले होते.

‘रॅट ट्रॅप’ लावण्यात आला होता. उंदरांच्या अंगावरील चिगर माइट्‌स काढून अभ्यासही केला होता. आता दोन जण आढळून आल्यामुळे पुन्हा स्क्रब टायफसबाबत जागरूकता अभियान सुरू करण्यात येणार असल्याची माहिती पुढे आली आहे.

जाणून घ्या - अमरावतीत कोरोना रुग्णांचा विस्फोट; प्रशासनाच्या पायाखालची सरकली जमीन

संशोधन दुर्लक्षित

यापूर्वी रॅट ट्रॅपअंतर्गत पकडण्यात आलेल्या उंदरावरील संशोधनाचे काय झाले हे अद्याप पुढे आले नाही. हे संशोधनच दुर्लक्षित राहिले होते. पावसाचा जोर वाढल्यानंतर स्क्रबचे रुग्ण कमी होत असल्याचे त्यावेळी सांगण्यात आले होते. मात्र, गारवायुक्त वातावरण स्क्रबसाठी पोषक असते.