ब्रेकिंग नागपूर जिल्हा : "त्या' दोघी मैत्रिणी, शेतात गेल्या कामावर आणि मौज करायला उतरल्या तळयात अन्‌ तिथेच झाला घात, वाचा...

.कोंढाळी (जि.नागपूर) : येथून सात किलोमीटर अंतरावरील घुबडी शिवारातील एका शेतकऱ्याच्या शेतात कामावर गेलेल्या दोन अल्पवयीन मजूर मुली शेततळ्यातील पाण्यात पोहण्यासाठी गेल्या असता, त्यांचा बुडून मृत्यू झाल्याची घटना गुरुवारी (ता. दोन) दुपारी बारादरम्यान घडली. अर्चिता गोमेश्वर मंगाम (वय 10), भाग्यश्री विजय येडमे (वय 11, दोन्ही रा. घुबडी) अशी मृत मुलींची नावे आहेत.

अधिक वाचा : पत्नीला पडला प्रश्‍न, पतीचा मृत्यू नेमका झाला ? वाचा धक्‍कादायक प्रकार...

सुटया असल्याने गेल्या कामावर
कोंढाळीनजीकच्या घुबडी येथील शेतकरी सेवकराम परतेती यांची गावाच्या थोड्या अंतरावरच शेती आहे. शेतात प-हाटीची लागवड केली आहे. सध्या शाळेला कोरोनामुळे सुट्या आहेत. त्यामुळे काम करून कुंटुबाला मदत व्हावी म्हणून कापसाला खत देण्याकरिता गावातील चार मुली गुरुवारी सकाळी शेतात कामावर आल्या होत्या. दुपारी बाराच्या सुमारास कामावरून सुट्टी मिळाल्यानंतर या चार मजूर मुली शेताबाहेर घरी गेल्या, असे शेतकरी सेवकराम परतेती यांना वाटले. मात्र, अर्चिता मंगाम व भाग्यश्री येडमे या दोन मुली दुसऱ्या रस्त्याने पुन्हा शेतात परत आल्या. त्याच्याच मागे असलेल्या दुर्गा राऊत (वय 10) व भाविका मसराम (वय 11) या दोन मुली धावून आल्या. तोपर्यंत अर्चिता व भाग्यश्री या दोघीही शेतातील शेततळ्यात पोहण्याकरिता पाण्यात उतरल्या. पाण्याचा अंदाज नसल्याने व शेततळ्यात पाच ते सहा फूट खोल पाणी असल्यामुळे दोन्ही मुली पाण्यात बुडू लागल्या.

अधिक वाचा : मंत्रिमहोदय, तुम्हीच सांगा, केव्हा होईल लागवड, केव्हा येईल फळ, का म्हणताहेत शेतकरी असे...

मैत्रिणींनी केली आरडाओरड
अन्य दोन मुली हे दृश्‍य बघून घाबरल्या व त्यांनी आरडाओरड केली. शेतात असलेले शेतकरी सेवकराम परतेती यांना माहिती दिली. त्यानंतर गावाकडे धाव घेऊन गावात माहिती दिली. अनेक तरुणांनी घटनास्थळ गाठून पाण्यातून दोघींना बाहेर काढले. मात्र, तोपर्यंत दोघींचाही मृत्यू झाला होता. या घटनेची माहिती कोंढाळी पोलिसांना देण्यात आली. पोलिसांनी घटनेचा पंचनामा करून आकस्मिक मृत्यूचा गुन्हा दाखल केला व दोन्ही मृतदेह शवविच्छेदनाकरिता काटोल येथील शासकीय रुग्णालयात पाठविण्यात आले. ठाणेदार श्‍याम गव्हाने यांच्या मार्गदर्शनात सुनील बन्सोड व पन्नालाल बटाऊवाले तपास करीत आहेत.