नवे संशोधन : व्हेंटिलेटर्ससाठी यू-शेप स्प्लिटर्स  

नागपूर : कोरोनाच्या काळात व्हेंटिलेटर्सची मर्यादित संख्या वैद्यकीय क्षेत्रासमोरील आव्हान मानण्यात येत आहे. हीच बाब लक्षात घेऊन जी. एच. रायसोनी अभियांत्रिकी महाविद्यालयातील प्राध्यापकांनी व्हेंटिलेटर्ससाठी 'यू' आकाराच्या विशेष 'स्प्लिटर्स' विकसित केले. त्यामुळे एकच व्हेंटिलेटर एकापेक्षा अधिक लोकांसाठी वापरता येणे शक्‍य होणार आहे. 

कोरोनाचा प्रादुर्भाव दिवसेंदिवस वाढत आहे. त्यामुळे रुग्णांच्या उपचारासाठी मोठ्या प्रमाणात व्हेंटिलेटरचा वापर करावा लागतो. देशातील रुग्णसंख्या बघता त्या तुलनेत व्हेंटिलेटरची संख्या बरीच कमी असल्याने परदेशातून त्याची मागणी केली आहे. सर्वसाधारण: एक व्हेंटिलेटर एका वेळी एकाच रुग्णासाठी वापरण्यात येते. मात्र, प्रत्यक्षात एका रुग्णासाठी त्याचा 25 ते 35 टक्केच उपयोग होत असतो. त्यामुळे व्हेंटिलेटर्सचा दोन किंवा अधिक रुग्णांसाठी एकाच वेळी वापर व्हावा यासाठी रायसोनी महाविद्यालयातील प्राध्यापकांनी 'यू' आकाराचे 'स्प्लिटर्स' तयार केले. सोबत 'सिंगल रिस्ट्रिक्‍टर'देखील विकसित केले. याचे इंदिरा गांधी शासकीय वैद्यकीय महाविद्यालय व रुग्णालयात (मेयो) यशस्वीपणे परीक्षणदेखील करण्यात आले.

अधिक वाचा : 'ती' म्हणते युद्धाचं मैदान सोडून येणार नाही!

महाविद्यालयाचे संचालक डॉ. सचिन उंटवाले यांच्या मार्गदर्शनात डॉ. विभा बोरा यांच्या चमूने या प्रकल्पावर काम केले. डॉ. नीलेश आवटे, प्रा. राहुल जिभकाटे, रोहन देशपांडे, गौतम नितनवरे, सचिन फरताडे या चमूचा समावेश होता. हे 'स्प्लिटर्स' परीक्षणासाठी मेयोच्या एनास्थिसीऑलॉजीच्या प्रोफेसर डॉ. वैशाली शेलगावकर यांच्या सुपूर्द करण्यात आले. पहिल्या परीक्षणानंतर यात काही सुधारणा सुचविण्यात आल्या होत्या. मागील आठवड्यात याचे अंतिम परीक्षण करण्यात आले. रायसोनी महाविद्यालयाने 'आयपीआर'अंतर्गत या 'स्प्लिटर्स'ची नोंदणी केली आहे.