हॉटेलमध्ये झालेला वाद कसाबसा झाला शांत; मात्र, घाबरलेला प्रकाश बेफाम धावत सुटला अन्

नागपूर : हॉटेलबाहेर दोन गटात भांडण झाले. भीतीपोटी एक तरुण रस्त्यावरून बेफाम धावत सुटला. त्याचवेळी भरधाव अज्ञात वाहनाने धडक दिली आणि त्याचा मृत्यू झाला. रविवारी रात्री कामठी मार्गावर ही घटना घडली. प्रकाश कोदर्लीकर (वय १९, रा. कांजी हाउस चौक, नवीन मंगळवारी) असे मृताचे नाव आहे.

पोलिसांनी दिलेल्या माहितीनुसार, रविवारी रात्री तो आपल्या मित्रांसोबत जेवण करण्यासाठी कामठी मार्गावरील गुरुपाल हॉटेलमध्ये गेला होता. जोरजोरात बोलत असल्याने हॉटेलमध्येच असलेल्या सुमारे ३० वर्षे वयोगटातील अनोळखी व्यक्तीने त्यांना टोकले. यावरून त्यांच्यात वाद झाला. कसाबसा वाद शांत झाला.

अनोळखी व्यक्तीने आपल्या साथीदारांना घटनेची माहिती देत मदतीसाठी हॉटेलबाहेर बोलावून घेतले होते. प्रकाश व त्याचे मित्र जेवण आटोपून बाहेर आले. त्यावेळी भांडण झालेल्या व्यक्तीचे साथीदारही हॉटेलसमोर पोहोचले होते. त्यांनी पुन्हा वाद घालण्यास सुरुवात केली. याप्रकाराने प्रकाश कमालीचा घाबरला आणि रस्त्याने पळून जाऊ लागला.

सविस्तर वाचा - मुंढेंचे कडक शासन; मृत्यूचा महापूर ते मुस्लिम बांधवांकडून हिंदूंच्या प्रेतांना अग्नी अन् नवा कोरोना स्ट्रेन

कामठी मार्गावरील तिरपुडे हॉस्पिटलसमोर अज्ञात वाहनाने त्याला धडक दिली. यामुळे प्रकाश गंभीर जखमी झाला. त्याला उपचारासाठी मेयो रुग्णालयात दाखल करण्यात आले होते. उपचारादरम्यान त्याचा मृत्यू झाला. याप्रकरणी जरीपटका पोलिसांनी गुन्हा दाखल केला आहे.