अज्ञातानी लावलेली आग विझवित होते वनमजूर, पण आग भडकली अन् निष्पाप जीवांचा गेला बळी

भंडारा : गोंदिया आणि भंडारा या दोन जिल्ह्याच्या मध्यभागी नागझिरा-पितेझरी अभयारण्य आहे. येथील एनएनटीआर वनपरीक्षेत्रामध्ये अज्ञात व्यक्तींनी गुरुवारी सकाळी साडेअकरा वाजण्याच्या सुमारास आग लावली. जंगलाला लागलेली आग पाहून वनमजूर आग विझविण्यासाठी धावले. मात्र, यामधअये तीन वनजमुरांचा होरपळून मृत्यू झाला, तर दोघे गंभीरित्या भाजले आहेत. त्यामुळे आता याला जबाबदार कोण? असा प्रश्न विचारला जात आहे.

हेही वाचा - क्रीडा संकुल, मंगल कार्यालयांचा उपयोग होऊ शकतो? उच्च...

गुरुवारी सकाळी ११.३० वाजताच्या सुमारास कक्ष क्र. ९८, ९९, १००, ९७ येथे आग लागली होती. सदर आग विझविण्याचे काम ५०-६० वन कर्मचारी, अधिकारी व हंगामी मजूर करत होते. सायंकाळी ५ वाजेपर्यंत आग आटोक्यात आली. पण दरम्यान वाऱ्याचा वेग वाढल्याने आग पुन्हा वाढली. विझविण्याचे कार्य सुरू असता कर्मचाऱ्यांना अचानक आगीने वेढले व पहाडी जागा असल्याने वणवा विझवणाऱ्यांपैकी दोन जण गंभीर जखमी झाले आणि ३ वनमजुरांचा मृत्यू झाला. मृतकांमध्ये राकेश युवराज मडावी (वय 40 वर्ष राहणार थाडेझरी), रेखचद गोपीचंद राणे (वय 45 राहणार धानोरी), सचिन अशोक श्रीरंगे (वय 27 राहणार कोसमतोंडी) यांचा समावेश आहे. तर विजय तीजाब मरस्‍कोले (वय 40 वर्ष राहणार थाडेझरी तालुका सडक अर्जुनी) व राजू शामराव सयाम (वय 30 वर्ष राहणार बोरुंदा) हे दोघे गंभीररीत्या भाजले आहेत. त्यांना पुढील उपचारासाठी नागपूरला पाठवलेले आहे. त्यांच्यावर उपचार सुरू आहेत.

हेही वाचा - रणजित सफेलकरवर आणखी एक खंडणीचा गुन्हा; ५० लाखांची मागणी; दीड कोटींचे दुकान हडपले

मरण पावलेले तिघे पहाडावर होते आणि त्यांना आगीने चहूबाजूने वेढले होते. त्यामुळे त्यांना खाली येता नाही आले. त्यांतील एक जण खाली आला त्याला आम्ही वाचवले. या घटनेनंतर आम्ही जबाबदारी झटकणार नाही. मृतांच्या कुटुंबीयांना जास्तीत जास्त मदत कशी करता येईल, त्यावर आमची चर्चा सुरू असल्याचे नवेगाव बंध नागझिराच्या उपसंचालक पूनम पाटे यांनी सांगितले.

कालच्या घटनेत तीन हंगामी मजूर मरण पावले, तर जखमी झालेल्या दोघांना आम्ही नागपूरच्या ऑरेंज सिटी हॉस्पिटलमध्ये दाखल केले आहे. तेथे त्यांच्यावर उपचार सुरू आहेत. मरण पावलेले हंगामी मजूर असल्यामुळे शासनाकडून काही मदत मिळेल, असे वाटत नाही. पण आमच्या स्तरावर मदत कशी करता येईल, असा आमचा प्रयत्न सुरू असल्याचे उपवनसंरक्षक रामानुजम म्हणाले.