पती पदयात्रेत, घरात सिलिंडरचा स्फोट; गर्भवती पत्नीसह चिमुकली ठार

यवतमाळ : पती देवाला साकडं घालण्यासाठी गेला असताना घरी सिलिंडरचा स्फोट (Yavatmal Cylinder Blast) झाला. यामध्ये गर्भवती पत्नीसह ४ वर्षीय चिमुकली ठार झाली. एका क्षणात हसतं-खेळतं कुटुंब उद्धवस्त झाल्यानं परिसरात हळहळ व्यक्त केली जात आहे. यवतमाळ जिल्ह्यातील आर्णी (Aarni Yavatmal) तालुक्यातील आयता गावात ही घटना घडली.

काजल जयस्वाल आणि चिमुकली परी जयस्वाल, असं मृत मायलेकींचं नाव आहे. आयता गावात विनोद जयस्वाल आपल्या कुटुंबासह राहत होते. विनोद यांना धामणगाव येथील मुंगसाजी महाराजांवर श्रद्धा होती. आज ९ मार्चला धामणगाव येथे पुण्यतिथी सोहळा असतो. त्यासाठी गावातून पदयात्रा जात असते. याच पदयात्रेत विनोद गेला होता. सुखी आयुष्यासाठी तो देवाला साकडं घालण्यासाठी गेला होता. पण, तो धामणगावात पोहोचला आणि त्याची गर्भवती पत्नीसह चिमुकली आगीत होरपोळून ठार झाले.

पत्नी काजल या गर्भवती असल्यानं चार वर्षीय चिमुकली परीसह घरीच होत्या. त्यांनी आज सकाळी साडेआठ वाजण्याच्या सुमारास स्वयंपाक करण्यासाठी गॅस पेटवला असता गॅसने भडका घेतला. यामध्ये सिलिंडरचा स्फोट झाल्याने घरातील संपूर्ण वस्तूने आगीत भडका घेतला. यामध्ये काजल आणि परी दोघीही जळून खाक झाल्या. तसेच घरासमोरील उंबराचे झाड देखईल भस्मसात झाले. घटनेची माहिती निवासी उपजिल्हाधिकारी ललितकुमार वऱ्हाडे यांना मिळताच त्यांनी घांटजी येथील अग्निशमन दलाला पाचारण केले. परंतु, ते पोहचण्यापूर्वीच गावातील नागरिकांनी आजूबाजूचे बोअरवेल चालू करून आग आटोक्यात आणली. पण दोघी मायलेकींना वाचवता आले नाही. त्यामुळे संपूर्ण गावात हळहळ व्यक्त केली जात आहे.