'त्याला' सतत मरणाची भीती वाटायची, आणि एक दिवस 

दर्यापूर (जि. अमरावती) : तो कुटुंबातील एकुलता एक मुलगा. 15 वर्षांपूर्वी वडिलांचे निधन झाले. आई आणि बहिणींचा तो एकुलता एक आधार. परंतु गेल्या काही दिवसांपासून त्याला सतत मृत्यूची भीती वाटत होती. तसे स्वप्नही त्याला पडत होते. सततच्या चिंतेमुळे त्याच्या आरोग्यावरही परिणाम झाला होता. यावर डॉक्‍टरांचे उपचारही सुरू होते. अशाच नैराश्‍यमयी अवस्थेत एक दिवस अघटित घडले. 

आकाश कुटुंबातील एकुलता एक मुलगा. घरात तीन बहिणी लग्नाच्या, वडील 15 वर्षांपूर्वीच मरण पावले. घरी शेती नाही. केवळ मजुरी करून उदरनिर्वाह करणारे हे कुटुंब. आकाशला गेल्या काही दिवसांपासून सतत मरणाची भीती वाटत होती. त्यामुळे रक्तदाब वाढत होता, आई व बहिणीने दर्यापुरातील रुग्णालयात तपासणीकरिता आणले होते. तपासणी झाल्यावर हे कुटुंब आई, बहीण व आकाश आपल्या गावी जाण्याकरिता निघाले. दरम्यान येथील एसटी स्टॅण्डजवळील पनपालिया किराणा दुकानासमोर भररस्त्यावर कापसाच्या गाठींनी भरलेल्या ट्रकने चिरडल्याने आकाश विजय राऊत (वय 30, रा. आराळा) याचा जागीच मृत्यू झाला. 

क्लिक करा - अमरावती शहरात सर्वत्र शुकशुकाट...नागरिकांमध्ये दहशत... काय आहे कारण

एसटी स्टॅण्डजवळ पायदळ चालत असताना मागून कापसाच्या गाठी भरलेला ट्रक शहरातून जात असताना व एकल रस्ता असल्याने वाहतुकीची गर्दी झाली होती. अचानक आकाश ट्रकच्या बाजूला ओढला गेला अन्‌ खाली पडून संपूर्ण ट्रक आकाशला चिरडून निघून गेला. या घटनेने अपघातस्थळी एकच हल्लकल्लोळ उडाला. लोकांची गर्दी जमली. आकाश या अपघातात जागीच ठार झाला होता. अपघात एवढा भीषण होता की आकाशचे धड व पाय वेगळे झाले. रस्त्यावर रक्ताचा सडा पडला होता. दर्यापूर पोलिसांनी तातडीने घटनास्थळ गाठत गर्दी पांगविली. रुग्णवाहिका बोलावून उपजिल्हा रुग्णालयात शवविच्छेदनास पाठविले. पुढील तपास दर्यापूर पोलिस करीत आहेत. 
 

कुटुंबावर मोठा आघात 

आकाशच्या कुटुंबात तो तीन बहिणी आणि आई आहे. पंधरा वर्षांपूर्वी वडिलांचे निधन झाले. कुटुंबात कमावता एकमेव असल्याने आकाशवर बऱ्याच जबाबदाऱ्या होत्या. बहिणीच्या लग्नाची त्याला चिंता होती. परंतु मुलाच्या अचानक जाण्याने आर्थिक विवंचनेत जगणाऱ्या कुटुंबावर मोठे संकट ओढवले आहे. 

संपादन : अतुल मांगे