वर्धेत दारूबंदीची अंमलबजावणी अन् शाळेच्या आवारालगतच मिळते दारू

वर्धा : दारूबंदी असलेल्या वर्ध्यात खुलेआम दारू मिळत असल्याचे अनेकांना माहीत आहे. आता तर दारूविक्रेत्यांनी शाळेचा आवार आपल्या ताब्यात घेतल्याने गावकरी संतप्त झाले आहे. रोहणा येथे असलेल्या शाळेच्या आवारात दारूची विक्री होत असल्याने मुलांचे भवितव्य धोक्यात आले आहे. या संदर्भात पालकांनी पोलिसांत तक्रार दाखल केली असली तरी त्यांच्याकडून कोणतीही कारवाई करण्यात आली नाही.

रोहणा या गावात गल्लीबोळातील दारूविक्रीमुळे नागरिक त्रस्त झाले आहेत. पोलिस चौकीपासून हाकेच्या अंतरावर आणि बसस्थानक परिसरातच दारू अड्डा सुरू आहे. या दोन्ही ठिकाणी तळिरामांची गर्दी उसळत असल्याने दारूविक्रीला पोलिसांचाच आशीर्वाद असल्याची ओरड गावकऱ्यांकडून होत आहे. गावात सर्वत्र दारू विक्रेत्यांचे प्रमाण वाढत असल्याने याचा नागरिकांना त्रास सहन करावा लागतो.

या दारू विक्रेत्यांना नागरिकांनी हटकले असता ते अंगावर चाल करून जातात. ‘पोलिस आमचे काहीही बिघडवू शकत नाही’, अशी धमकी देत असल्याने गावातील युवक व मजूरवर्ग मोठ्या प्रमाणात व्यसनाच्या आहारी जात आहे. दारूविक्रीचे तयार झालेले अड्डे त्वरित बंद न झाल्यास आंदोलन करण्याचा इशारा गावकऱ्यांनी दिला आहे.

अनेक मुले गेले आहारी

सध्या आठवी ते बारावीच्या शाळा सुरू आहेत. या शाळेत जाणारी मुलेही या दारूच्या आहारी गेल्याने पालकांत रोष व्यक्त करण्यात येत आहे. पालकांच्या हातून अनुचित प्रकार घडण्यापूर्वी पोलिसांनी कारवाई करावी अशी मागणी करण्यात येत आहे.