अमरावती शहरात साखळी चोरांचा धुमाकूळ; गेल्या महिनाभरात अनेक घटना 

अमरावती ः शहरात चेनस्नॅचरचा चांगलाच धुमाकूळ सुरू आहे. एका महिलेची सोनसाखळी दुचाकीस्वारांनी जबरीने हिसकावली. त्यानंतर दोघींची हिसकण्याचा प्रयत्न झाला, मात्र त्यात दुचाकीस्वार यशस्वी होऊ शकले नाही.

शहरात भरदुपारी काही तासांच्या अंतराने राजापेठ, प्रशांतनगर बगीचासह शेगाव मार्गावर या घटना घडल्या. राजापेठ हद्दीत मालूनगरात एक महिला घरासमोरच्या झाडावर फुले तोडीत होती. महिला बेसावध असल्याचे बघून एका अनोळखी व्यक्तीने पाठीमागून येऊन गळ्यातील 16 ग्रॅम वजनाची 70 हजार रुपयांची सोनसाखळी जबरीने हिसकावून पळ काढला. 

अधिक वाचा - २४ वर्षांपूर्वी रेल्वेस्थानकावर सापडलेल्या 'वर्षा'चं गृहमंत्री अनिल देशमुख करणार कन्यादान 

दुचाकीवर दोघे पाठलाग करीत आले होते. त्यापैकी मागे बसलेला एकजण खाली उतरला, दुचाकीस्वार थोड्या अंतरावर दुचाकी सुरू करूनच थांबला होता. चेन हिसकल्यानंतर दोघेही पसार झाले. मंगळवारी (ता. आठ) दुपारी दोनच्या सुमारास ही घटना घडली. राजापेठ पोलिसांनी याप्रकरणी गुन्हा दाखल केला. 

त्यानंतर काही मिनिटांच्या फरकाने प्रशांतनगर बगीचा समोरून एक महिला रस्त्याने जात असताना दुचाकीस्वाराने तिच्याही गळ्यातील सोनसाखळी हिसकण्याचा प्रयत्न केला, परंतु महिला सावध असल्यामुळे तिची सोनसाखळी बचावली. सदर महिलेने पोलिसांना माहिती दिली. परंतु तक्रार नोंदविली नाही, असे फ्रेजरपुराचे पोलिस निरीक्षक पुंडलिक मेश्राम यांनी सांगितले. 

अधिक माहितीसाठी - राणे दाम्पत्य आत्महत्या प्रकरणाचे गूढ उकलले : कुत्र्याचे इंजेक्शन देऊन पत्नीने केला पती, मुलांचा खून

कठोरा मार्गावर सायंकाळी पोटे टाउनशीप मार्गावरही एका महिलेच्या गळ्यातील सोनसाखळी हिसकण्याचा प्रयत्न झाला. याप्रकरणी पोलिस घटनास्थळी पोहोचले, तशी नोंद घेतली. परंतु तक्रार न दिल्याने गुन्हा दाखल झाला नाही.

संपादन - अथर्व महांकाळ