गारठा वाढला : गडचिरोली जिल्ह्यात थंडीने पुन्हा धरला जोर

सिरोंचा (जि. गडचिरोली) : काही दिवसांपूर्वी वातावरणात बदल होऊन उबदार वातावरण जाणवत असताना आता आठवड्यापासून पुन्हा थंडीने जोर धरल्याचे दिसून येत आहे. त्यामुळे जिल्ह्याच्या ग्रामीण भागांत पुन्हा शेकोट्या पेटू लागल्या आहेत. विशेषत: जिल्ह्याच्या दक्षिणेकडील शेवटच्या टोकावर असलेल्या सिरोंचा तालुक्‍यात थंडीची तीव्रता अधिकच वाढली आहे.

वातावरणातील काही प्रमाणात कमी झालेली थंडी मागील दोन-तीन दिवसांपासून पुन्हा परतली आहे. रात्रीच्या तापमानात घट झाल्याने अनेक ठिकाणी हुडहुडी भरली आहे. साधारणत: जानेवारी महिन्याच्या दुसऱ्या आठवड्यापासून दिवसाचे तापमान वाढण्यास प्रारंभ होते. यावर्षी तशी चाहूलही लागली होती. काही दिवस तापमानामध्ये वाढही नोंदविण्यात आली. मात्र, जानेवारी महिना संपला आणि फेब्रुवारी प्रारंभ झाला, तरी पुन्हा थंडी कमी होण्याऐवजी वाढण्यास प्रारंभ झाला आहे.

जाणून घ्या - सतत थकवा जाणवतो, काम करण्याची इच्छा होत नाही; आयुर्वेदात आहे तुमच्या प्रश्नांची उत्तरे

तापमान मोठ्या प्रमाणात कमी झालेले दिसून येत आहे. रात्री व सकाळच्या सुमारास नागरिक शेकोटीचा आधार घेताना दिसून येत आहेत. अधूनमधून येणाऱ्या ढगाळ वातावरणामुळे गेल्या पंधरवड्यात थंडी टप्याटप्यात कमी होत गेली. ढगाळ वातावरणाने दुपारच्या सुमारास उकाडा वाटत होता, ढगाळ वातावरण दूर होताच मागील दोन-तीन दिवसांपासून पुन्हा थंडीने जोर पकडला आहे. त्यामुळे अनेक नागरिक उबदार कपडे घालून घराबाहेर पडत आहेत.

थंडीचा जोर आणखी काही दिवस कायम राहण्याची शक्‍यता व्यक्त होत आहे. विशेष म्हणजे मकरसंक्रांतीनंतर सूर्याचे उत्तरायण सुरू झाले की, आता थंडी कमी होऊन तापमानात वाढ होईल, असे मानले जाते. पण, यंदा उलटेच घडताना दिसत आहे. त्यामुळे थंडीचा कडाका सहन करणाऱ्या नागरिकांना पुन्हा काही दिवस हे हुडहुडी भरविणारे दिवस सहन करावे लागतील, असे दिसून येत आहे.

जाणून घ्या - जेवणासाठी बाहेर गेलेल्या मुलाची २८ दिवासांनी फक्त मिळाली कवटी; टी-शर्ट बघताच आईने फोडला हंबरडा

वृक्षतोडही वाढली

थंडीच्या दिवसांत गरम पाणी व शेकोटीसाठी लाकडांची मागणी वाढते. सरकारने उज्ज्वला गॅस योजनेतून गॅस शेगडीचे कनेक्‍शन दिले असले, तरी सिलिंडर रिफीलिंगचे दर गगनाला भिडले आहेत. त्यामुळे गरीब नागरिक पुन्हा जंगलावरच अवलंबून राहू लागले आहेत. जिल्ह्यात अनेक ठिकाणी वाघांचा वावर असतानाही नागरिक जिवावर उदार होऊन सरपणासाठी जंगलात जाताना दिसून येत आहेत. त्यामुळे वृक्षतोडही वाढल्याचे दिसत आहे.