"कोरोना'मुळे शेतातच सडतो भाजीपाला; उत्पादकांवर आर्थिक संकट

नवेगावबांध (जि. गोंदिया) : मागील महिन्यात आलेल्या अवकाळी पावसामुळे भाजीपाल्याचे पीक उद्‌ध्वस्त झाले; तर उरले-सुरले पीक व सावरलेले भाजीपाला उत्पादक आता या कोरोनामुळे त्रस्त झाले आहेत. दररोज निघणारा भाजीपाला विकावा कुठे? या संभ्रमात शेतकरी आहेत.

वांगी, मिरची, टमाटर, भेंडी, कारली, कोबी, चवळी, कोथिंबीर आदी भाजीपालावर्गीय पिकांची लागवड सावरटोला, बोरटोला, परसोडी, पांढरवाणी सोमलपूर, गुढरी, देऊळगाव, बोदरा यासह अन्य गावांत करण्यात आली आहे.

भाजीपाला विकण्यासाठी बाजारपेठ उपलब्ध करा

परंतु, लग्न व इतर सार्वजनिक समारंभावर बंदी असल्यामुळे भाजीपाला उत्पादकांवर संक्रात आली आहे.
लॉकडाउनमुळे मजूर उपलब्ध होत नाही, त्यामुळे शेतातील भाजीपाला मनुष्यबळाअभावी काढला जात नाही. तो शेतातच सडत आहे, तर दुसरीकडे शेतातून निघणारा भाजीपाला विकायचा कुठे? असा दुसरा प्रश्न भाजीपाला उत्पादकांसमोर उभा ठाकला आहे. इकडे आड तिकडे विहीर, अशी परिस्थिती भाजीपाला उत्पादक शेतकऱ्यांची सध्या झाली आहे. परिसरात निघणारा भाजीपाला विकण्यासाठी बाजारपेठ उपलब्ध करून द्यावी किंवा शीतगृहाची व्यवस्था करावी, अशी मागणी जिल्हा परिषद सदस्य व भाजीपाला उत्पादक किशोर तरोणे यांनी केली आहे.

भाजीपाला विकायचा कुठे?

शेतात लावलेला भाजीपाला रोज काढल्या जातो. त्याशिवाय पर्याय नाही. बाजारपेठ उपलब्ध नसल्यामुळे मोठ्या शहरात हा भाजीपाला पाठविला जात नाही. भंडारा, गोंदिया, नागपूर अशा ठिकाणी आतापर्यंत शेतकरी आपला भाजीपाला विकत होते. लॉकडाउनमुळे वाहतुकीच्या समस्या असल्यामुळे शेतात रोज निघणारा भाजीपाला विकायचा कुठे? असा गंभीर प्रश्न भाजीपाला उत्पादक शेतकऱ्यांसमोर उभा ठाकला आहे.

जाणून घ्या : ते आहेत घरापासून दूर हजारो मैलांवर...जेवणही झाले होते दुरापास्त...कोणी आले देवदूत बनून आणि...

लाखो रुपयांची वांगी शेताबाहेर फेकली

बाजारात 30 ते 40 रुपये किलो विकला जाणारा भाजीपाला आज पाच-सहा रुपये किलोच्या भावाने विकूनही विकत नाही. त्यामुळे बहुतांश उत्पादक शेताच्या बाहेरच भाजीपाला फेकत असल्याचे वृत्त आहे. बाकटी येथील एका शेतकऱ्याने लाखो रुपयांची वांगी शेताबाहेर फेकल्याची घटना आठ-दहा दिवसांपूर्वी घडली.