ते आहेत घरापासून दूर हजारो मैलांवर...जेवणही झाले होते दुरापास्त...कोणी आले देवदूत बनून आणि..

गोंडपिंपरी (जि. चंद्रपूर) : लाॅकडाऊन भारतीय इतिहासातील अभुतपुर्व प्रसंग. कोरोनाने अनेकांचे बळी घेतले.
मात्र या काळात माणुसकीचेही दर्शन जागोजागी घडत आहे. आपण चांगले केले की आपल्या वाट्याला चांगलेच येते.याचा प्रत्यय पुण्याच्या एका अधिका-याला आला. स्पर्धा परीक्षेसाठी पुण्यात थांबलेल्या  दोन तरूणांना मदतीचा हात देणा-या अधिका-याच्या भावालाही दिल्लीत  माणुसकीचा ओलावा अनुभवायला मिळाला.
   प्रशांत आनंदराव खर्डीवार पुणे जिल्हा परिषदेमध्ये समाजकल्याण निरीक्षक अधिकारी म्हणून गेल्या अनेक वर्षापासून कार्यभार सांभाळत आहेत.ते मुळचे गोंडपिपरीचे. संवेदनशिल मनाच्या प्रशांतने प्रचंड संघर्ष करून यश मिळवलय.देशात कोरोनाचेतुफान आले.अनं सारेच थांबले.पुणे हे स्पर्धा परीक्षेचे माहेरघर.राज्यातील हजारो तरूण येथे स्पर्धा परीक्षेच्या तयारीसाठी येतात. यंदा राज्य लोकसेवा आयोगाच्या परीक्षा दोनदा समोर ढकलल्या गेल्या. कोरोनाच्या धास्तीने हे परिक्षार्थी आपआपल्या गावाकडे परतले.पण गडचिरोली व भंडारा येथील दोन तरूण पुण्यातच अडकले.कोरोनाने स्थिती गंभीर झाली.जेवणाची मेस बंद झाली. अशा स्थितीत त्यांची चांगलीच पंचाईत होत होती. त्यांची माहिती प्रशांतला मिळाली अनं लागलीच या दोघांशी संपर्क साधत त्यांना आपल्या घरी बोलाविले.लाॅकडाऊनपासून ते दोघेही प्रशांतसोबतच पुण्यात त्याच्या फ्लँटवर आहेत.आपल्या हातून काहीतरी चांगले व्हावे असे समाजातील संवेदनशील माणसांना नेहमीच वाटते.आपण चांगले केले की चांगले होणारच हा तसा निसर्गाचा नियम आहे.
    प्रशांतचा लहान भाऊ सशांत खर्डीवार हा दिल्लीत युपीएससीची तयारी करतोय.कोरोनाने दिल्लीतही हाय अलर्ट आहे. लाॅकडाऊनच्या काळात त्याचे दोन रूममेट आपआपल्या राज्यात परतले.अनं सुशांत तिथेच अडकला.सशांत राहतो तो भाग हाँटस्पाँट झोन म्हणून सरकारने जाहीर केला.मेसवाल्यांनी जेवण देणे बंद केले. जे काही रूमवर होते त्यातून सशांतेन चार ते पाच दिवस खिचडी भातावर  निभावले.
सुशांतच्या रूमलगत सेवानिवृत्त शिक्षिका मीना व्दिवेदी या आपल्या कुटुंबियासोबत राहतात.सुशांतची अस्वस्थता त्यांनी जाणली.अनं तेव्हापासून त्या आपल्या मुलाप्रमाणे त्याची काळजी घेत आहेत.एकीकडे प्रशांतने आपल्या जिल्हयाकडील दोघांना मदतीचा हात दिला.अन त्याच्या लहान भावाला  मीना व्दिवेदी यांच्या रूपाने माणुसकीचा ओलावा अनुभवायला मिळाला.सुशांतची व्यवस्था झाल्याची माहिती मिळताच प्रशांतने समाधानाचा सुस्कारा सोडला.

सविस्तर वाचा - या चिमुकल्यांच्या कुटुंबाची कहाणी देईल तुम्हाला जगण्याचे बळ...एकदा वाचाच

अनेकांसाठी प्रेरणादायी

कोरोनामुळे माणसे शरीराने दूर जात असली तरी मनाने जवळ येत आहेत. हाच संदेश या दोन घटनांनी समाजाला दिला आहे.चांगले कर्म केले की फळ मिळतेच. हा निसर्गाचा नियम प्रशांतने या लाॅकडाॅउनच्या काळात अनुभवला. प्रशांतचे वडील आंनदराव खर्डीवार हे सेवानिवृत्त कर्मचारी आहेत.ते आपल्या पत्नीसह गोंडपिपरीतच असतात. जनाधारच्या माध्यमातून ते सामाजिक कार्यात सक्रीय आहेत. त्यांच्या मुलाने दाखविलेले सामाजिक दायित्व अनेकांसाठी प्रेरणादायी ठरले आहे.