धामधूम संपली, धाकधुक वाढली!

यवतमाळ : जिल्ह्यातील सातही मतदारसंघांत विधानसभा निवडणुकीसाठी सोमवारी (ता.21) सकाळी सात ते सायंकाळपर्यंत 60 टक्के मतदान झाले. जिल्ह्यातील सातही विधानसभा मतदारसंघांतील 87 उमेदवारांचे भाग्य मशीनबंद झाले आहे. त्यामुळे आता उमेदवारांची धामधुम संपली असली तरी धाकधूक मात्र वाढली आहे.

सकाळी मतदानाला प्रारंभ झाला, त्यावेळी मतदानासाठी केंद्रांवरील कर्मचाऱ्यांना मतदारांची प्रतीक्षा करावी लागली. ग्रामीण भागात पहिल्या टप्प्यात बऱ्यापैकी मतदान झाले. त्यातुलनेत शहरी भागात मतदानाची टक्केवारी कमी होती. सकाळी नऊनंतर मतदार घराबाहेर पडले. वणी येथे एका मतदान केंद्रावर इव्हीएम यंत्रणा दोन वेळा बंद पडल्याने दोन तास कर्मचाऱ्यांची तारांबळ उडाली होती. बाभूळगाव तालुक्‍यातील टाकळी येथे इव्हीएम काही वेळासाठी बंद पडली होती. दारव्हा तालुक्‍यातही काही भागांत ईव्हीएम बंद पडल्याच्या घटना घडल्या. मात्र, काही वेळात यंत्रणा सुरळीत झाली. दुपारी दोननंतर शहरी भागातील मतदान केंद्रांवर मतदारांनी मतदानासाठी गर्दी केली होती. यवतमाळ विधानसभेतील शहरी भागात संवेदनशील मतदान केंद्र होती. त्या ठिकाणी तगडा पोलिस बंदोबस्त ठेवण्यात आला होता. मतदान केंद्रापासून 200 मीटर अंतरापर्यंत वाहन थांबा व उभे राहण्यास मज्जाव करण्यात आला होता. जिल्हाधिकारी अजय गुल्हाने यांनी शहर व जिल्ह्यातील काही मतदान केंद्रांना भेटी दिल्या. मतदान केंद्रावरील स्थितीची पाहणी केली. जिल्हाभरात "ईव्हीएम' बंदच्या काही मतदान केंद्रांवरील तक्रारी सोडल्यास शांततेत मतदान झाले. मतदारांसोबत जिल्ह्यातील सर्वच राजकीय पक्षांचे प्रमुख उमेदवारांसह दिग्गज नेत्यांनी मतदान करून राष्ट्रीय कर्तव्य बजावले. कोणतीही अनुचित घटना घडू नये, यासाठी तगडा पोलिस बंदोबस्त ठेवण्यात आला होता.

सात मतदारंसंघात दुपारपर्यंत 33 टक्के मतदान

जिल्ह्यातील सात मतदारसंघांत विधानसभा निवडणुकीसाठी सोमवारी (ता.21) मतदानप्रक्रिया सुरू आहे. सकाळी सात ते दुपारी एकपर्यंत 33.19 टक्के मतदान झालेले होते. शहरी भागात निरुत्साह असल्याचे बघावयास मिळाले. 
सकाळी मतदानाला प्रारंभ झाला, त्यावेळी मतदानासाठी केंद्रावरील कर्मचाऱ्यांना मतदारांची प्रतीक्षा करावी लागली. नऊनंतर मतदार घराबाहेर पडले. वणी येथे एका मतदान केंद्रावर इव्हीएम यंत्रणा दोन वेळा बंद पडल्याने दोन तास कर्मचाऱ्यांची तारांबळ उडाली होती, तर बाभूळगाव तालुक्‍यातील टाकळी येथे इव्हीएम काही वेळासाठी बंद पडली होती. दुपारी दोननंतर मतदान केंद्रांवर मतदारांनी मतदानासाठी गर्दी केली होती. जिल्ह्यात दुपारी एकपर्यंत यवतमाळ मतदारसंघात सर्वांत कमी 26.69 टक्के मतदानाची नोंद करण्यात आली होती. वणीत 34.92, राळेगाव 34.4, दिग्रस 37.72 टक्के, आर्णी 34.36 टक्के, पुसद 33.44 टक्के, उमरखेड 33.46 टक्के याप्रमाणे सरासरी 33.19 टक्के मतदानाची नोंद करण्यात आली. राजकीय पक्षांच्या प्रमुख उमेदवारांसह दिग्गज नेत्यांनी मतदान करून राष्ट्रीय कर्तव्य बजावले. जिल्हाधिकारी अजय गुल्हाने यांनी मतदान करून केंद्राचा आढावा घेतला. कोणतीही अनुचित घटना घडू नये, यासाठी तगडा पोलिस बंदोबस्त ठेवण्यात आला होता.