चंद्रपूर : चंद्रपूर जिल्ह्यातील ताडोबा अंधारी व्याघ्र प्रकल्प हा वाघांसाठी जगभर प्रसिद्ध आहे. देशविदेशांतील पर्यटक केवळ आणि केवळ वाघोबाच्या दर्शनासाठी ताडोबाला येतात. ताडोबा जंगलात वाघांची संख्या आता वाढली आहे. जागा कमी पडू लागल्याने वाघोबा नवीन जागेच्या शोधात ताडोबा परिसरालगत असलेल्या गावांत फिरत आहे. चंद्रपूर शहराला लागूनच ऊर्जानगरचा भाग आहे. झुडुपी जंगल, आवडते खाद्य वाघोबाला मिळत आहे. याच कारणामुळे एका वाघोबाने या भागात आपले बस्तान मांडले आहे. रविवारी (ता. 15) सकाळच्या सुमारास या मार्गाने ये- जा करणाऱ्यांना या वाघाने आपले दर्शन दिले.
चंद्रपूर शहराला लागूनच महाऔष्णीक वीज केंद्र आहे. चंद्रपूर ते महाऔष्णीक वीज केंद्राच्या मार्गावर झुडपी जंगल आहे. याच परिसरातून नाला वाहतो. अस्वल, रानडुकर, हरण, सांबर, चितळ यासह अन्य वन्यप्राण्यांचा या परिसरात नेहमीच वावर असतो. आता त्यात वाघाची भर पडली आहे. वाघोबाला आपले आवडते खाद्य मिळत आहे. त्यामुळे वाघाने आपला मुक्काम या भागात वाढविला आहे. जवळपास एक-दीड महिन्यांपासून सातत्याने याच परिसरात वाघ फिरत आहे. पंधरा दिवसांपासून रात्रीच्या सुमारास वाघासोबत त्याच्या फॅमिलीचे दर्शन अनेकांना झाले होते. त्याचा व्हिडिओही सोशल माध्यमावर व्हॉयरल झाला.
दिवसाढवळ्या या भागात वाघ दिसत असल्याने नागरिकांत भीतीचे वातावरण पसरले आहे. शनिवार दुपारी दीड वाजताच्या सुमारास वाघ गायीच्या मागे धावतपळत राष्ट्रवादीनगरातील नागमंदिर परिसरात आला. तेव्हा याच भागात काही महिला सरपण गोळा करीत होत्या. महिलांनी आरडाओरड सुरू केली. त्यामुळे वाघोबाने तेथून धूम ठोकली. त्यानंतर वनविभागाचे कर्मचारी तेथे आले. त्यांनी फटाके फोडले. रविवारी याच परिसरातील झुडपी जंगल जाळण्यात आले.
ऊर्जानगरच्या झुडपी जंगलात बोर, मोहफुलाची झाडे मोठ्या प्रमाणावर आहे. बोर, मोहफुल अस्वलीस मोठ्या प्रमाणावर आवडते. त्यामुळे या भागात मोठ्या प्रमाणावर अस्वली दिसून येत आहे. ऊर्जानगरला लागून असलेल्या प्रवेशद्वार छोटे उद्यान आहे. याच परिसरात अनेकांना अस्वल दिसून आली.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.