बेरोजगारीत निराश न होता उच्च शिक्षित तरुणानं सुरु केलं कौतुकास्पद काम; आर्थिक परिस्थितीमुळे संभाळतोय वडिलांचा व्यवसाय 

गडचिरोली : जगात कुठलंच काम लहान किंवा मोठं नसतं असं म्हणतात. काम करताना त्या कामाप्रती असलेली भावना महत्वाची असते. सध्या गडचिरोली जिल्ह्यातील एक तरुण हीच गोष्ट प्रत्यक्षात जगतो आहे. हातात उच्च शिक्षणाच्या पदवीची भेंडोळी असूनही कुठेच नोकरी किंवा मोठी संधी न मिळाल्याने तो आता वडिलांचे अंडीविक्रीचे दुकान सांभाळत आहे. विनोद श्‍यामसुंदर उराडे, असे या हिंमतबाज तरुणाचे नाव आहे.

घरची आर्थिक परिस्थिती बेताची असलेल्या विनोद उराडेला शिक्षणात विलक्षण गती आहे. पण कमवा आणि शिका, याच तत्त्वाचे त्याला पालन करावे लागले. अगदी सातव्या वर्गापासून ते दहावीपर्यंत त्याने वृत्तपत्र विक्रीचे काम केले. दहावीपासूनच पुढे त्याला आर्थिक परिस्थितीमुळे वडिलांचा अंडीविक्रीचा व्यवसाय सांभाळावा लागला. स्थानिक इंदिरा गांधी चौकात त्याचे छोटेसे अंडीविक्रीचे दुकान आहे. हा व्यवसाय सांभाळतानाही त्याने शिक्षणावरचे लक्ष विचलित होऊ दिले नाही. उत्तम गुणांनी उत्तीर्ण होत त्याने येथील शासकीय तंत्र निकेतन महाविद्यालयात स्थापत्य अभियांत्रिकी (सिव्हिल इंजिनिअरिंग) च्या अभ्यासक्रमाला प्रवेश घेतला. 

हेही वाचा - मनपा निवडणुकीसाठी महाविकास आघाडी जोमात, सरकारकडून विकासकामांचा सपाटा, तर महापालिकेतील...

एकीकडे छोट्याशा अंडेविक्रीच्या दुकानात ग्राहक सांभाळतानाच त्याने अभ्यासाचा समतोलही साधला आणि मागील वर्षीच आपले अभियांत्रिकीचे शिक्षण यशस्वीरीत्या पूर्ण केले. स्थापत्य अभियंता झाल्यानंतर आपले नशीब पालटेल. चांगल्या शासकीय विभागात नोकरी मिळेल किंवा मोठ्या कंपनीत काम मिळेल, अशी स्वप्ने तो रंगवत होता.

सध्याच्या कोरोनाच्या महामारीत आधीच नोकऱ्यांवर गंडांतर येत असून प्रत्येक क्षेत्र थंडावले आहे. त्यामुळे त्याच्यावरचा बेरोजगारीचा शिक्‍का पुसलाच गेला नाही. अखेर त्याने आहे तोच व्यवसाय नीट करण्याचा निर्णय घेतला. उच्च शिक्षणाच्या पदवीची भेंडोळी कपाटात जपून ठेवत पुन्हा अंडी विक्रीच्याच व्यवसायात व्यस्त झाला. 

येथेही व्यवसायाचा विस्तार करण्याच्या दृष्टीने आता तो विविध समारंभाचे कॅटरिंगचे कंत्राटही घेतो. खरेतर मोठ, मोठ्या इमारती, पूल, रस्ते बांधण्याचे कंत्राट घेण्याची क्षमता त्याच्या शिक्षणात आहे. पण, परिस्थितीचा रेटा आणि एकूणच देशात उद्‌भवलेली समस्या, ती निवारू न शकलेले सरकार, यामुळे त्याच्या वाटाच बंद झाल्या. असे असले, तरी हाती असलेले कोणतेही काम छोटे नसते, या भावनेने तो आपला छोटासा व्यवसाय प्रामाणिकपणे करत आहे. एखादी शैक्षणिक पदवी मिळताच शेतातील मातीत हात न घालणाऱ्या, छोटी नोकरी किंवा व्यवसायांना नकार देणाऱ्या तरुणांना विनोदचा हा संघर्ष बरेच काही शिकवणारा आहे.

नक्की वाचा - वैदर्भीयन गारठले; नागपुरात पारा ८.४ अंशांवर, तर गोंदियासह यवतमाळात सर्वात कमी...

नृत्यकलेतही निपुण

शासकीय तंत्र निकेतनमधून स्थापत्य अभियंता झालेला विनोद उराडे नृत्यकलेतही निपुण आहे. गडचिरोलीच्या जिल्हास्तरीय युवा महोत्सवातील नृत्य स्पर्धेत त्याने सलग दोनदा प्रथम क्रमांक पटकावला. शिवाय मुंबईत पार पडलेल्या सीएम चषक स्पर्धेतील समूह नृत्यात द्वितीय क्रमांक प्राप्त केला आहे.

संपादन - अथर्व महांकाळ