अमरावतीत काँग्रेस सज्ज भाजप मात्र शांत; कोण मारणार बाजी? उद्या होणार सभापतिपदाची निवडणूक

Election of Chairman post in Amravati corporation
Election of Chairman post in Amravati corporation

अमरावती ः जिल्हापरिषदेच्या महत्त्वाच्या अशा शिक्षण व बांधकाम समिती सभापतिपदाची निवडणूक शनिवारी (ता.20) होणार आहे. बहुमताच्या आधारे कॉंग्रेस सज्ज झाली असली तरी भाजप आघाडीच्या गोटात मात्र अद्यापही शांतता आहे. निवडणूक लढवावी किंवा नाही याची चाचणी भाजपकडून केली जात आहे.

शिक्षण व बांधकाम समितीच्या सभापती प्रियंका दगडकर यांचे आकस्मिक निधन झाल्यामुळे सभापतिपदाची निवडणूक होवू घातली आहे. बहुमताच्या आधारे कॉंग्रेसकडेच हे पद राहणार असल्याचे निश्‍चित मानले जात आहे, मात्र भाजपकडून अद्यापही काही चमत्कार होईल का ? याची चाचपणी केली जात आहे. 

पालकमंत्री यशोमती ठाकूर, जिल्हापरिषद तथा जिल्हा कॉंग्रेसचे अध्यक्ष बबलू देशमुख, माजी आमदार प्रा. वीरेंद्र जगताप यांची शनिवारी सकाळी या संदर्भात बैठक होणार आहे. या बैठकीत उमेदवाराचे नाव फायनल होणार असल्याचे सांगितले जात आहे. 

त्यासाठी अध्यक्षांच्या शासकीय निवासस्थानी राजकीय घडामोडींना वेग आला असून कॉंग्रेस व आघाडीच्या सर्व सदस्यांना शनिवारी सकाळी शासकीय बंगल्यावर येण्याच्या सूचना देण्यात आल्या आहे. तेथून दुपारी 1 वाजताच्या सुमारास जिल्हापरिषदेत नामांकन तसेच वेळ पडल्यास मतदानासाठी सदस्यांना आणले जाईल.

सुरेश नीमकर यांना कौल

माजी आमदार प्रा. वीरेंद्र जगताप यांचे निकटवर्तीय सुरेश नीमकर यांची सभापतिपदी निवड होणार यावर आता शिक्कामोर्तब झाले आहे. सुरेश नीमकर हे पहिल्यांदाच सदस्य झाले असून ते धामणगाव रेल्वे तालुक्‍यातील तळगाव दशासर सर्कलचे प्रतिनिधित्व करतात.

असे आहे संख्याबळ

एकूण सदस्यसंख्या 59
- सत्ताधारी आघाडी ः कॉंग्रेस 26, राष्ट्रवादी 5, शिवसेना 3, अपक्ष 1 (एकूण 35)
- विरोधी आघाडी ः भाजप 13, प्रहार 5, युवा स्वाभिमान 2, बसपा 1 (एकूण 21)
- रिक्तपदे ः 3

संपादन - अथर्व महांकाळ 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com