व्हीव्हीपॅटची स्लीप दिसणार सात सेकंद

नागपूर : निवडणुकांमध्ये आता ईव्हीएमला व्हीव्हीपॅट लावण्यात येणार आहे. यामुळे मत कुणाला दिले याची खात्री होणार आहे. व्हीव्हीपॅटची मशीन असणार असून, फक्त सात सेकंदच स्लीप पाहता येणार आहे. त्यानंतर स्लीप संबंधित बॉक्‍समध्ये जमा होणार असल्याने पाहता येणार नाही, असे जिल्हाधिकारी अश्‍विन मुद्‌गल यांनी सांगितले.
अत्याधुनिक ईव्हीएम जिल्ह्याला मिळाल्या आहेत. 9,436 बॅलेट तर 5,486 कंट्रोल युनिट आहेत. 5,486 व्हीव्हीपॅट मशीन मिळाल्या आहेत. या मशीन सरकारची कंपनी असलेल्या बी.ई.एल. व ई.सी.आय.एल. कंपनीकडून तयार केल्या आहेत. ईव्हीएम मशीनची प्राथमिक तपासणी कळमना येथे झाली. तपासणीत 89 बॅलेट युनिट, 127 कंट्रोल युनिट तर 375 व्हीव्हीपॅट मशीन खराब निघाल्या. त्या कंपनीला परत केल्या आहेत. व्हीव्हीपॅट व ईव्हीएमच्या तपासणीसाठी पक्षांच्या प्रतिनिधींना बोलावले होते. तपासणीच्या वेळी एकाही लोकप्रतिनिधीकडून विरोध दर्शविण्यात आला नाही किंवा आक्षेप घेण्यात आला नसल्याचे जिल्हाधिकारी कार्यालयात आयोजित पत्रकार परिषदेत मुद्‌गल यांनी सांगितले. मतदान केल्यानंतर व्हीव्हीपॅट मशीनमध्ये मतदान झालेल्या व्यक्‍तीचे नाव, पक्षाचे चिन्ह व मतदान ओळख पत्रातील क्रमांक स्लीपमध्ये दिसेल. ही स्लीप सात सेकंद राहील. त्यानंतर स्लीप व्हीव्हीपॅट मशीनला असलेल्या डब्यात जमा होईल, असेही ते म्हणाले.
आक्षेप घेता येईल
मतदान करताना व्हीव्हीपॅट मशीनच्या स्लीपमध्ये दुसऱ्याच उमेदवाराचे चिन्ह दिसल्यास, तसे वाटल्यास किंवा स्लीप न दिसल्यास मतदाराला केंद्रप्रमुखाकडे फॉर्म 17 ए भरून आक्षेप नोंदविता येईल. स्लीप मतदारांना मिळणार नसल्याचे मुद्‌गल यांनी सांगितले.  
एक मतदान केंद्रावरील व्हीव्हीपॅट स्लीपची तपासणी
प्रत्येक विधानसभा क्षेत्रातील एका मतदान केंद्रावरील ईव्हीएममधील मत, मतदार यादीतील नोंद व व्हीव्हीपॅट स्लीपची तपासणी होणार आहे. यात तफावत आढळ्यास संबंधित ठिकाणी नव्याने मतदान होईल, असेही मुद्‌गल यांनी सांगितले.

ईव्हीएम कॅल्क्‍युलेटर प्रमाणे आहे. त्याचा कोणत्याही इतर वस्तूशी संबंध येत नाही. त्यामुळे त्याला हॅक करणे किंवा दुरून हाताळणे शक्‍य नाही. नवीन मशीन अतिशय सुरक्षित आहे.
- अश्‍विन मुद्‌गल, जिल्हाधिकारी.