वाघिणीच्या हल्ल्यात शेतकरी ठार

गडचिरोली - शेतानजीकच्या जंगलात बैल चारत असताना टी- ६ वाघिणीने हल्ला करून एका शेतकऱ्यास ठार केले. ही घटना गुरुवारी (ता. ३) दुपारी दोन वाजताच्या सुमारास गडचिरोलीपासून ८ किलोमीटर अंतरावरील राजगाटा चेक गावानजीक घडली.

सुधाकर भोयर (वय-५०) रा. राजगाटा चेक असे मृत शेतकऱ्याचे नाव आहे. सुधाकर भोयर हे गुरूवारी बैल घेऊन आपल्या शेतावर गेले होते. शेतालगतच्या जंगलात बैल चारत असताना अचानक भोयर यांच्यावर वाघिणीने हल्ला केला. यात ते जागीच ठार झाले. घटनेची माहिती मिळताच पोलिस आणि वनाधिकाऱ्यांनी घटनास्थळ गाठून मृतदेहाचा पंचनामा केला.

वारंवार वाघाच्या हल्ल्यांच्या घटना घडत असल्याने नागरिक भयभीत झाले आहेत. हल्ला करणारी टी-६ वाघीण असल्याचे पाेर्लाचे वनपरीक्षेत्र अधिकारी राकेश मडावी यांनी सांगितले. या वाघीणीने आतापर्यंत ६ जणांचे बळी घेतले आहेत. राजगाटा चेक परिसरात टी-६ वाघिणीचे अस्तित्व असून, दोन दिवसांपूर्वी ती वनविभागाच्या कॅमेरा ट्रॅपमध्ये दिसून आली. त्यामुळे वनविभागाने परिसरातील नागरिकांना नोटिसीद्वारे जंगलात न जाण्याची सूचना केली होती. तरीही नागरिक बिनधास्तपणे जंगलात जात असल्याने वाघांच्या हल्ल्यांचे प्रमाण वाढले आहे.