साखरपुडा होताच तरुणावर अत्याचाराचा गुन्हा दाखल

अमरावती : लग्नाचे आमिष दाखवून प्रेयसीवर अत्याचारही केला. परंतु, साखरपुडा दुसऱ्याच तरुणीसोबत गुपचूप उरकला. त्यामुळे दुसरीसोबत बोहल्यावर चढण्याचे स्वप्न बघणाऱ्या तरुणाविरुद्ध लग्नापूर्वीच अत्याचाराचा गुन्हा दाखल करण्यात आला.

हेही वाचा - महापौर संदीप जोशींना कोरोनाची लागण, संपर्कात आलेल्यांना चाचणी करण्याचा सल्ला

प्रवेश ऊर्फ बिट्टू साहू, असे अत्याचाराचा गुन्हा दाखल झालेल्या संशयित आरोपीचे नाव असल्याचे नांदगावपेठ पोलिसांनी सांगितले. पीडित तरुणी जेथे नोकरी करायची त्याचठिकाणी संशयित आरोपी प्रवेश ऊर्फ बिट्टू याच्यासोबत तिची ओळख झाली. प्रेमप्रकरणानंतर प्रवेशने तरुणीला लग्नाचे आमिषसुद्धा दाखविले. त्यानंतर तिच्यासोबत अनेकदा शारीरिक संबंध प्रस्थापित केले. तीन वर्षांनंतर प्रवेशचे लग्न दुसऱ्या तरुणीसोबत जुळले. ही बाब माहिती होताच, पीडितेने त्याची भेट घेतली.

हेही वाचा - एकेकाळी दिग्रसमध्येच खुलायचे भाव, पण आता शेतकऱ्यांना कापूसविक्रीसाठी कापावे लागणार ३५ किलोमीटर अंतर

प्रेयसीने दुसऱ्या मुलीसोबत लग्न करू नकोस, झालेला साखरपुडा तोडण्याचा सल्ला दिला. त्यानंतर पीडित तरुणीच्या घरी जाऊन प्रवेशसह त्याच्या काही निकटवर्तीयांनी वाद घातला. शिवीगाळ करून अपमानित केले. अत्याचाराची तक्रार दिल्यास प्रवेश व त्याच्या निकटवर्तीयांनी जिवाने मारण्याची धमकी दिली, असा आरोप पीडितेने नांदगावपेठ ठाण्यात दाखल तक्रारीत केला. याप्रकरणी पोलिसांनी प्रवेश ऊर्फ बिट्टू साहू विरुद्ध अत्याचाराचा, तर इतरांविरुद्ध जीवे मारण्याची धमकी आणि अ‌ॅट्रॉसिटी ऍक्‍ट अन्वये गुन्हा दाखल केला. याप्रकरणी अद्याप कुणालाही अटक झाली नाही, असे नांदगावपेठ पोलिसांनी सांगितले.