आंदोलकास बळजबरीने केले मेयोत दाखल

नागपूर - हलबा क्रांती सेनेतर्फे १५ नोव्हेंबरपासून अनिश्‍चितकालीन उपोषणाला बसलेल्या कमलेश भगतकर यांना पोलिसांनी रुग्णालयात दाखल केले. यास विरोध केल्याने पोलिसांनी बळाचा केल्याचा आरोप करून हलबा सेनेच्या कार्यकर्त्यांनी तीव्र घोषणाबाजी केली. त्यामुळे गांधीबाग परिसरात काहीवेळ तणाव निर्माण झाला होता. आता भगतकर यांच्या जागी समाजाचे ज्येष्ठ नागरिक विजय मौंदेकर उपोषणाला बसले आहेत. 

हलबा समाजाला आरक्षण द्यावे याकरिता हलबा क्रांती सेनेच्यावतीने जगदीश खापेकर यांच्या नेतृत्वात गांधीबाग उद्यान परिसरातील रा. बा. कुंभारे यांच्या पुतळ्याजवळ आंदोलन सुरू केले. पहिल्या दिवसापासून कमलेश भगतकर या तरुणाने अनिश्‍चितकालीन उपोषण सुरू केले होते. त्याच्या समर्थनात क्रांती सेनेतर्फे वेगवेगळे आंदोलनही करण्यात आले. दरम्यान, कमलेश यांची प्रकृती खालावत चालली होती. तरीही त्यांनी उपोषण सोडण्यास नकार दिला होता.

त्यामुळे पोलिसांनी बुधवारी (ता.२१) सातव्या दिवशी सकाळी कुणीही कार्यकर्ते नसल्याचे बघून सकाळी आठ वाजताच्या सुमारास त्यांना उचलून मेयो रुग्णालयात दाखल केले. कमलेश यांना नेताच पन्नासावर पोलिसांचा फौजफाटा आला होता. पोलिसांच्या कारवाईची माहिती मिळताच शंभरच्यावर तरुण कार्यकर्ते येथे गोळा झाले. सरकार आणि पोलिस कारवाईच्या विरोधात घोषणाबाजी केली. त्यामुळे परिसरात काही काळ तणाव निर्माण झाला होता. बुधवारी ईद असल्याने तरुणांना शांत राहण्याचे आवाहन करण्यात आले होते. 

भगतकरांचे आंदोलन, मौंदेकरांचे उपोषण
पोलिसांनी कमलेश भगतकर यांना उचलून रुग्णालयात दाखल केले असले तरी त्यांनी  रुग्णालयातही असहकार दर्शवित उपोषण सोडण्यास नकार दिला आहे. सरकारने पोलिसांच्या मदतीने दडपशाही करून आंदोलन दडपण्याचा प्रयत्न चालविला आहे. मात्र, हलबा समाज या दडपशाहीला घाबरत नाही. शरीरात शेवटचा श्‍वास असेपर्यंत मी समाजाच्या न्यायासाठी लढा  देणार. माझ्यानंतरही समाजाचा झेंडा उचलण्यासाठी तरुण तयार आहेत. सुटी झाल्यानंतर मी पुन्हा आंदोलनात सहभागी होऊन उपोषण सुरू ठेवणार, असा इशारा भगतकर यांनी दिला. दुसरीकडे, सातव्या दिवशी पोलिसांनी कमलेश यांचे उपोषण थांबविल्यानंतर त्यांच्या जागी समाजातील ज्येष्ठ नागरिक विजय मौंदेकर यांनी बुधवारपासून उपोषण सुरू केले आहे. कमलेश भगतकर यांनी जो विडा उचलला तो आम्ही पुढे नेऊ आणि आंदोलन असेच सुरू ठेवू, असे मनोगत मौंदेकर यांनी व्यक्त केले.