मंत्र्यांच्या प्रतिमेवर एवढा काय परिणाम होणार?, यशोमती ठाकूर प्रकरणावर कोर्टाची विचारणा 

नागपूर ः महिला व बालविकास मंत्री यशोमती ठाकूर यांच्या शिक्षेविरोधातील अर्जावरील सुनावणीदरम्यान मंत्र्यांना शिक्षा झाल्यास त्यांच्या प्रतिमेवर एवढा काय परिणाम होणार? अशी विचारणा मुंबई उच्च न्यायालयाच्या नागपूर खंडपीठाने  केली.

आठ वर्षे जुन्या प्रकरणात यशोमती ठाकूर यांच्यासह त्यांच्या तीन कार्यकर्त्यांना अमरावती सत्र न्यायालयाने तीन महिने कारावास आणि १५ हजार ५०० रुपये दंडाची शिक्षा ठोठावली होती. ठाकूर यांनी उच्च न्यायालयात धाव घेत शिक्षा स्थगित करण्याची विनंती केली आहे. त्यावरील सुनावणी दरम्यान शिक्षेमुळे काय परिणाम होईल अशी विचारणा न्यायालयाने केली. 

त्यावर वरिष्ठ विधिज्ञ सुबोध धर्माधिकारी, ॲड. अनिकेत निकम यांनी बाजू मांडताना सामजात जाताना शिक्षेचा डाग प्रतिमा मलीन करणारा ठरत असल्याचा युक्तिवाद केला. गत सुनावणीप्रसंगी न्यायालयाने यशोमती ठाकूर यांना सुनावण्यात आलेल्या तीन महिन्यांच्या कारावासाच्या शिक्षेला स्थगिती देत सरकारला नोटीस बजावून उत्तर सादर करण्याचे आदेश दिले होते. 

अधिक माहितीसाठी - एक लक्षात ठेवा! राष्ट्रवादी आता राज्यात काँग्रेसपेक्षा मोठा पक्ष; शहराध्यक्ष अनिल अहीरकर यांनी दिला इशारा
 

सरकारचे शपथपत्र आणि याचिकाकर्यांकडून सादर करण्यात आलेली कागदपत्रे न्यायालयासमोर येऊ शकली नाहीत. संपूर्ण रेकॉर्ड रीतसर न्यायालयात सादर करण्याचे आदेश देत न्यायालयाने याप्रकरणाची सुनावणी आता मंगळवारी निश्चित केली आहे.

२४ मार्च २०१२ रोजी मारहाणीची ही घटना घडली होती. यशोमती ठाकूर त्यांच्या कार्यकर्त्यांसोबत चुनाभट्टीकडून गांधी चौकाकडे केवळ एकबाजूच्या वाहतुकीसाठी असणाऱ्या (वन वे) मार्गाने जात होत्या. कर्तव्यावरील पोलिस कर्मचारी उल्हास रौराळे यांनी त्यांना थांबविले. 

यावरून त्यांच्यात वाद झाला. यानंतर पोलिस कर्मचाऱ्याच्या तक्रारीवरून राजापेठ पोलिसांनी यशोमती ठाकूर यांच्यासह सागर खांडेकर, शरद जवंजाळ व राजू इंगळे या तीन कार्यकर्त्यांविरुद्ध गुन्हा दाखल केला होता. या प्रकरणात अमरावती सत्र न्यायालयाने चारही जणांना शिक्षा ठोठावली. यानंतर चौघांनीही जामीन मिळविला.

संपादन  : अतुल मांगे