अंकिताला जिवानिशी ठार करणे हाच होता विकेशचा उद्देश 

हिंगणघाट (जि. वर्धा) : अंकिताला जाळून जखमी करणे नाही, तर तिला जिवानिशी ठार करणे हाच त्याचा उद्देश असल्याचे बयाण हिंगणघाटच्या घटनेतील आरोपी विकेश नगराळे याने पोलिसांना दिले आहे. सोमवारी (ता. 10) अंकिताचा मृत्यू झाल्याने त्याचा कट पूर्णत्वास गेल्याचे या बयाणातून पुढे आले आहे. 

हिंगणघाट येथील नंदोरी चौकात 3 फेब्रुवारी रोजी आरोपी विकेश नगराळे याने पेट्रोल टाकून अंकिताला जाळले होते. या घटनेचे पडसाद संपूर्ण राज्यात उमटले. जनभावना संतप्त झाल्या. पोलिसांनी अवघ्या चार तासांमध्ये आरोपीला ताब्यात घेतले. पोलिसांच्या तपासात अनेक बाबी उघड झाल्या. अंकिता पिसुड्डे आणि विकेश नगराळे हे दारोडा या गावचे रहिवासी. विकेश हा अंकितापेक्षा तीन वर्षे मोठा आहे. प्राथमिक शिक्षणानंतर पुढील शिक्षणासाठी दोघेही हिंगणघाटला जाणे-येणे करायचे. एकाच गावातील असल्याने या दोघांमध्ये ओळख होती. उच्च शिक्षणासाठी अंकिता वर्ध्याला गेली. 

अवश्‍य वाचा-  हिंगणघाटच्या "त्या' दुर्दैवी घटनेतील मृत अंकितावर अंत्यसंस्कार 

विकेशच्या प्रेमाला तिने दिला होता नकार

दरम्यान, मागील वर्षी विकेशचे लग्न झाले. शिक्षण आटोपून अंकिता गावात आल्यानंतर सात महिन्यांपूर्वी हिंगणघाट येथे एका खासगी महाविद्यालयात प्राध्यापिका म्हणून रुजू झाली होती. विकेशने तिच्याकडे प्रेमसंबंध ठेवण्याविषयी आग्रह धरला. अंकिताने याला नकार देत आपल्या पित्याकडे तक्रार केली. येथूनच तिला मारण्याचा कट रचल्याचे त्याने पोलिसांना बयाणात सांगितले. पोलिस सूत्रांकडून मिळालेल्या माहितीनुसार, विकेशने महिनाभरापूर्वीच अंकिताला पेट्रोल टाकून निर्दयीपणे जाळून मारण्याची योजना बनविली होती. फक्त दिवस व वेळ निश्‍चित नव्हता. अखेर त्याने सोमवारी, तीन फेब्रुवारीला या घटनेला मूर्तरूप दिले. 

आजंती शिवारात बदलविले कपडे

 अंकिताला पेट्रोल टाकून जाळल्यानंतर आरोपी विकेश नगराळे याने आपल्या दुचाकीने थेट आजंती शिवार गाठले. येथील कालव्याच्या शेजारी त्याने कपडे बदलविले. कपड्यांसह इतर सर्व साहित्य तिथेच लपवून ठेवत तो टाकळघाटकडे पळाला. दरम्यान, पोलिसांना त्याचा सुगावा लागताच त्याला ताब्यात घेण्यात आले होते.