Video : लॉकडाऊनमुळे अमरावतीत शुकशुकाट; दहा दिवसांत आढळले तब्बल ४,८०३ कोरोनाबाधित

अमरावती : कोरोना विषाणूचा प्रादुर्भाव जिल्ह्यात प्रचंड प्रमाणात वाढल्याने रविवारी (ता. २१) लॉकडाऊन घोषित करण्यात आला. त्याला नागरिकांनी उत्स्फूर्त प्रतिसाद दिल्याने सर्वत्र शुकशुकाट दिसून आला. विशेष म्हणजे, एरवी रविवारी प्रचंड गर्दी असलेल्या इतवारा बाजाराच्या मार्गावरसुद्धा एकही वाहन किंवा दुचारी दिसून आली नाही.

केवळ औषधीची दुकाने तसेच रुग्णालये सुरू असून, भाजीपाला आणि दुधासाठी सकाळी सहा ते दहा वाजेपर्यंत सूट देण्यात आली होती. सर्व दुकाने, व्यापारी प्रतिष्ठाने, हॉटेल, खानावळी एवढेच नव्हे तर एसटी बसेस तसेच महापालिकेची सिटीबससुद्धा बंद होती. ऑटो व खासगी वाहतूक व्यवस्थासुद्धा बंद ठेवण्याचे आवाहन प्रशासनाच्या वतीने करण्यात आल्याने एकही ऑटो किंवा सायकलरिक्षा रस्त्यावर दिसले नाहीत.

जिल्ह्यात लॉकडाऊन अतिशय कडकडीतपणे पाळण्यात आला. सोमवारी (ता. २२) सकाळी आठ वाजेपर्यंत ही संचारबंदी कायम राहणार आहे. विशेष म्हणजे, दहा दिवसांत अमरावतीत तब्बल ४,८०३ कोरोनाबाधित आढळून आल्याने चांगलीच खळबळ उडाली आहे. शनिवारी (ता. २०) सायंकाळपर्यंत ७२७ नवे रुग्ण आढळून आले होते. यासोबतच एकाच दिवशी सात जणांना मृत्यू झाल्याने नागरिकांनासुद्धा चांगलाच हादरा बसला होता.

अधिक माहितीसाठी - नागरिकांनो! सोन स्वस्त, आताच करा खरेदी; लवकरच होणार विक्रमी दर?

प्रमुख चौकांमध्ये खडा पहारा

संचारबंदीदरम्यान नागरिकांनी घराबाहेर पडू नये, असे आवाहन प्रशासनाच्या वतीने करण्यात आले आहे. पालकमंत्री यशोमती ठाकूर यांनी दुपारी दोन वाजता जिल्हाधिकारी कार्यालयात बैठक बोलविली आहे. कोरोनाला रोखण्यासाठी विविध उपाययोजना करण्यात येत आहेत. त्यामुळे काल रात्रीपासूनच पोलिसांचा सर्वच प्रमुख चौकांमध्ये खडा पहारा आहे.