Vidhan Sabha 2019 : सावनेरमध्ये भाजपचा "ब्लाईंड गेम' 

विधानसभा 2019 :
नागपूर - सावनेरवर एकछत्री राज्य असलेल्या आमदार सुनील केदारांचे वर्चस्व मोडून काढण्यासाठी यंदा भाजपने जातीय समीकरण बाजूला ठेवून जिल्हाध्यक्ष डॉ. राजू पोतदार यांना मैदानात उतरवले आहे. यंदा भाजप गंभीरपणे लढतीत उतरल्याने दोन्ही नेत्यांसाठी निवडणूक प्रतिष्ठेची झाली आहे. भाजपने खेळलेला "ब्लाईंड गेम' पोतदारांचे राजकीय भवितव्य ठरविणारा आहे. 

मुख्यमंत्री देवेंद्र फडणवीस यांची महाजनादेश यात्रा सावनेर मतदारसंघातील कळमेश्‍वर येथे पोहोचल्यावर डॉ. राजीव पोतदार यांना आशीर्वाद देण्याचे आवाहन केले होते. तेव्हापासून डॉ. पोतदार यांची बाजू उमेदवारीसाठी मजबूत झाली होती. ते 2004 पासून भाजपकडे उमेदवारीसाठी तगादा लावत होते. मध्यंतरी युतीमध्ये सावनेरची जागा शिवसेनेला द्यावी अशी मागणी करून खेळी करण्याचा प्रयत्न केला. परंतु, मुख्यमंत्र्यांचे लाडके असलेल्या पोतदारांवर त्यांचा कोणताही परिणाम झाल्याचे दिसले नव्हते. यातच सिल्लेवाडा येथे स्टार बससेवेच्या उद्‌घाटनाचा वाद भाजपच्या पथ्यावर पडला. पोतदार यांची उमेदवारी निश्‍चित होण्याचा मार्गही मोकळा झाला. तेव्हापासूनच सावनेरची लढत ही केदार यांच्यासाठी सोपी नसेल असे चित्र दिसू लागले होते. 

सावनेरच्या राजकारणावर दबदबा असणाऱ्या केदार यांनी ही बाब अचूक हेरली. कॉंग्रेसच्या पहिल्याच यादीत नाव आल्याने त्यांचे वजनही वाढल्याचे समोर आले. शिवाय भाजपवरही दबाव वाढविण्यात ते यशस्वी ठरले. उमेदवारी अर्ज दाखल करताना सावनेरमध्ये जमलेली केदार समर्थकांची गर्दी त्यांच्या वर्चस्वाची पावती देणारी होती. यामुळे भाजपच्या गोटात धडकी भरली. केदार यांचा आक्रमक प्रचार सुरू आहे. तेवढीच आक्रमकता भाजप दाखविण्याचा प्रयत्न करीत आहे. अमित शहा यांची खापरखेडा येथील सभा रद्द झाल्याने भाजपच्या प्रचाराची धार बोथड झाली, हे विशेष. पोतदार हे शांतपणे प्रचार करीत आहे. ही वादळापूर्वीची शांतता तर नाही ना! अशीही शंका उपस्थित केली जात आहे. 

मतदारसंघातील कळमेश्‍वर व सावनेर तालुक्‍यात कुणबी समाजाचे वर्चस्व आहे. यातही धनोजे कुणबी समाज एकवटल्याचे चित्र यापूर्वी दोन वेळा निर्माण झाल्याने केदार यांचा एकदा पराभव तर दुसऱ्यांदा निसटता विजय झाला होता. यावेळी धनोजे कुणबी समाजातील सोनबा मुसळे व रामराव मोवाडे यांना उमेदवारी दिली नसल्याने मते केदारांना मिळतील अशी आशा केदारांना वाटत आहे. दुसरीकडे स्वत:ची प्रतिमा तयार करण्यात पोतदार यांना यश आले असले तरी त्याचे रूपांतर मतांमध्ये होणार का? हे पाहणे औत्सुक्‍याचे ठरणार आहे.