मित्राचा फोन बेतला जीवावर, एकुलता एक तरुण मुलगा गमावल्यानं आई-वडिलांनी फोडला हंबरडा

बल्लारपूर ( जि. चंद्रपूर ) : रंग खेळून मित्रांसोबत नदीवर अंघोळीसाठी गेलेल्या एका तरुणाचा बुडून मृत्यू झाला. 29 मार्च रोजी दुपारी दोन वाजताच्या सुमारास ही घटना घडली. ऋषिकेश संजय कोतपल्लीवार (वय 21) असे मृत तरुणाचे नाव आहे. 

हेही वाचा - क्या बात है! आता बॉम्ब निकामी करणार स्वदेशी ‘वॉटरजेट डीसरप्टर'; DRDO चे संशोधक...

सोमवारी रंगपंचमीचा दिवस होता. ऋषिकेश आपल्या मित्रांसोबत घराशेजारीच रंग खेळत होता. बराचवेळ रंग खेळून झाल्यावर तो घराकडे जाण्यासाठी निघाला. वाटेतच त्याला त्याच्या मित्राचा फोन आला. त्यामुळे कुटुंबाला माहिती न देताच ऋषिकेश मित्रासोबत वर्धा नदीवर अंघोळीसाठी गेला. तेथेच त्याचा खोल पाण्यात तोल गेला. पाण्यात बुडून मृत्यू झाला. घडलेल्या घटनेची माहिती मित्रांनी कोतपल्लीवार कुटुंबांना दिली. कुटुंबातील एकुलता एक तरुण मुलगा अचानक गेल्याने कोतपल्लीवार कुटुंबीयांवर शोककळा पसरली आहेत. या घटनेची माहिती वडील संजय कोतपल्लीवार यांनी पोलिसांनी दिली. पोलिसांनी अल्पावधीतच मृत ऋषिकेशचा शोध घेतला. शवविच्छेदनासाठी शव ग्रामीण रुग्णालयात नेण्यात आले. घटनेचा पुढील तपास बल्लारपूर पोलिस करीत आहेत.