दारूड्या द्यायचा आई अन् भावाला त्रास, लहान भावासोबत वाद झाला अन् सर्वच संपलं

मूल (जि. चंद्रपूर ) : दारूडया भावाशी झालेल्या मारहाणीत लहान भावाकडून मोठया भावाचा घात झाल्याची घटना तालुक्‍यातील केळझर येथे मंगळवारी (ता. 2) सायंकाळी घडली. सुनील राजाराम मानकर (४०), असे मृताचे नाव असून आरोपीला अटक करण्यात आली आहे.

हेही वाचा - "आई तुझा प्रॉब्लेम काय आहे?" असं विचारत...

मूल पोलिस स्टेशन हद्दीतील केळझर येथील सुनील राजाराम मानकर (40) याला दारूचे व्यसन होते. दररोज दारू पिऊन घरी येणे, आई व भावाला शिवीगाळ करून मारहाण करणे, हे त्याचे नित्याचे काम झाले होते. दोन मार्च रोजी संध्याकाळी सहा  वाजताच्या सुमारास नेहमीप्रमाणे सुनील दारू पिऊन घरी आला. कारण नसताना वाद उकरून काढून त्याने आईला शिवीगाळ करणे सुरू केले. दरम्यान, घरी असलेला लहान भाऊ सुभाष राजाम मानकर (38) याने मोठा भाऊ सुनीलला विनाकारण शिवीगाळ करू नको, असे समजावत खोली बाहेर काढण्याचा प्रयत्न केला. त्या कारणावरून सुनील आणि सुभाषमध्ये शाब्दीक वाद झाला. शाब्दीक वाद विकोपाला जाऊन प्रकरण हातापाईवर पोहोचले. सुनीलने  लहान भाऊ सुभाषला जिवंत मारतो असे म्हणत घरात ठेवलेला लोखंडी दांडका हातात घेतला. लोखंडी दांडका घेऊन सुभाषवर वार करण्याचा प्रयत्न केला. सुभाषने सुनीलचा प्रतिकार केला. सुनीलच्या हातामधून दांडका खेचत असताना झालेल्या झटापटीत राग अनावर झालेल्या सुभाषने सुनीलच्या हातातील दांडक्याने सुनीलाच मारहाण केली. परिणामी, दारूडा सुनील जागीच गतप्राण झाला.

हेही वाचा - बापरे! गृहविलगीकरणातील रुग्णाचा मुक्तसंचार, तपासणी पथकाकडून दंडात्मक कारवाई

या घटनेची माहिती मूल पोलिसांना होताच ठाणेदार राजपूत आणि सहायक पोलीस निरीक्षक मनोज गदादे सहकाऱ्यांसह  केळझर येथे घटनास्थळी दाखल झाले. घटनास्थळाच्या प्रत्यक्ष पाहणीनंतर आई गिरीजाबाई मानकर (60) हीच्या तक्रारीवरून घटनेची नोंद घेऊन लहान भाऊ सुभाष याला ताब्यात घेतले. तपासाअंती सुभाष मानकर याला मोठया भावाची हत्या केल्याचे कारणावरून अटक करण्यात आली.