चार वर्षीय बालिकेसोबत अश्लील चाळे

संग्रामपुर (बुलढाणा) - तालुक्यातील चांगेफळ येथील चार वर्षीय बालिकेसोबत अश्लील चाळे करणाऱ्याविरुद्ध तामगाव पोलिस स्टेशनमध्ये आज (12 जानेवारी) फिर्याद देण्यात आली आहे.

चांगेफळ येथील 59 वर्षीय इसमाने 10 जानेवारीच्या सायंकाळी गावातीलच चार वर्षीय बालिकेला गोठयात नेऊन तिला मारहाण करून तिच्यासोबत अश्लील चाळे करण्याचा किळसवाना प्रकार केला. मुलगी घरात दिसून आली नाही. म्हणून त्या बालिकेचे वडील तिला शोधत असताना सदर इसम दारुच्या नशेत पडून दिसून आला. बाजूला बालिकाही होती. अत्याचार ग्रस्त बालिकेच्या वडिलाने त्या इसमाच्या भावाला घडलेला प्रकार सांगितला. त्यावर त्या विकृताला त्याच्या भावाने चांगलाच चोप दिला. आज या घटनेची फिर्याद तामगाव पोलिस स्टेशनला देण्यात आली. पोलिसांनी त्या बालिकेला  वैद्यकीय तपासणीसाठी अकोला येथे पाठविले असून वैद्यकीय अहवालानुसार कार्यवाही करण्यात येणार असल्याची माहिती पोलिस सुत्राकडून मिळाली.