बारमध्ये गर्दी जमवणे भोवले, मालकाला ३० हजारांचा दंड

नागपूर : उंटखाना चौकातील ट्रिलियम मॉलमधील (trillium mall nagpur) एजंट जॅक बारमध्ये तरुणाईने कोविड नियम पायदळी तुडविल्याची (corona rules violation) घटना शनिवारी रात्री उघडकीस आली. बारमध्ये मोठी गर्दी असल्याची माहिती मिळताच धंतोली झोनचे उपद्रव शोध पथक व इमामवाडा पोलिसांनी (imamwad police nagpur) संयुक्तपणे कारवाई केली. बारमालकाला तीस हजारांचा दंड ठोठावण्यात आला. (30 thousand fine to bar owner for violation of covid rules)

उंटखाना चौकातील ट्रिलियम मॉल अनेकांच्या आकर्षणाचा केंद्र असून तरुणाई येथे खरेदीसाठी येते. अनेक तरुण शनिवारी एजंट जॅक बारमध्येही दिसून आले. कोविड नियम सर्रास पायदळी तुडविले जात असल्याबाबत महापालिकेच्या उपद्रव शोध पथकाला माहिती मिळाली. धंतोली झोनच्या सहायक आयुक्त किरण बगडे यांच्या निर्देशानुसार उपद्रव शोध पथकाचे झोन प्रमुख नरहरी बिरकड, दिनेश सहारे, हिरानाथ मालवे, सुशील लांडगे यांनी इमामवाडा पोलिसांसह रात्री साडेनऊच्या सुमारास छापा टाकला. यावेळी मोठ्या प्रमाणात तरुण आढळले.मास्क, सोशल डिस्टन्सिंगचा पूर्णपणे बोजवारा उडाल्याचे आढळून आले. बारमध्ये १०० पेक्षा जास्त लोक एकाच वेळी होते. गर्दीवर नियंत्रण ठेवण्यासाठी बार मालकाने कुठलीही व्यवस्था केलेली नसल्याचेही पुढे आले. अखेर बारमालकावर ३० हजार रुपयांचा दंड ठोठावला.