प्रेमसंबंधात तरुणीचे लैंगिक शोषण; गर्भपात करून प्रियकराचा लग्नास नकार

नागपूर : लग्नाचे आमिष दाखवून प्रियकराने तरुणीचे लैंगिक शोषण करीत गर्भधारणा झाल्याने तिचा गर्भपात केला. मात्र, त्यानंतर लग्नास नकार देत विश्‍वासघात केला. या प्रकरणी गणेशपेठ पोलिसांनी २३ वर्षीय पीडितेच्या तक्रारीवरून आरोपी तरुणावर गुन्हा नोंदविला आहे.

दीपेश प्रल्हाद पाठोडे (२७) रा. चिमूर, चंद्रपूर असे आरोपी तरुणाचे नाव आहे. सप्टेंबर २०१८ मध्ये पीडितेची दीपेशशी ओळख झाली. मैत्रीनंतर दोघात प्रेमसंबंध निर्माण झाले. त्याने पीडितेला भेटण्यासाठी मासोळी बाजार परिसरातील हॉटेल आदर्शमध्ये बोलावले. तिच्याशीच लग्न करण्याची थाप मारून हॉटेलमध्ये पीडितेशी शारीरिक संबंध प्रस्थापित केले. तेव्हापासून तो सतत तिचे लैंगिक शोषण करीत होता. दरम्यान पीडिता गर्भवती झाली.

तिने दीपेशला माहिती देऊन लवकर लग्न करण्यास सांगितले. दीपेशने लग्नापूर्वी गर्भवती असल्याचे समोर आले तर बदनामी होईल असे सांगून तिला गर्भपात करण्यासाठी तयार केले. त्याने गर्भपातानंतर लग्न करण्याचे वचन दिले होते. दोघांनीही एका डॉक्टरशी संपर्क करून गर्भपात करून घेतला. त्यानंतर दीपेशचे वागणे बदलले. त्याने पीडितेशी दुरावा केला. तो तिला सतत टाळू लागला.

काही दिवसांपूर्वी त्याने तिला लग्न करण्यास स्पष्ट नकार दिला. पीडितेने पोलिसात जाण्याचे बजावले असता दीपेशने दोघांच्या संबंधाची माहिती पीडितेचे मित्र आणि नातेवाईकांना देऊन बदनाम करण्याची धमकी दिली. पीडितेने गणेशपेठ पोलिसात तक्रार केली. पोलिसांनी विविध कलमान्वये गुन्हा नोंदवून दीपेशला अटक केली. न्यायालयातून त्याची पोलिस कोठडीत रवानगी झाली आहे.