Gold Rate : सोन्याचा दर उच्चांकी पातळीवर, चांदी देखील महागली; हे आहे कारण..

नागपूर : आंतरराष्ट्रीय बाजारात प्रचंड चढउतार सुरू असल्याने सोने-चांदीचे दर नवनवीन विक्रम करीत आहे. सोन्याने आज पुन्हा नवा उच्चांक गाठला. १० ग्रॅम सोने ४०० रुपयांनी महागले आणि ६३ हजार ७०० रुपयांवर गेले आहे. काल सोन्याने आपला उच्चांक गाठला होता. तेव्हा त्याची किंमत ६३ हजार ३०० रुपये प्रती १० ग्रॅम होती.

शेअर बाजारात सुरू असलेल्या चढ उतारामुळे सोन्याला आधार मिळत आहे. त्यामुळे पुढील एका वर्षात हे सोने ६७ हजार रुपये प्रती १० ग्रॅमवर ​​जाऊ शकते असे संकेत आहेत. सोन्यासोबतच चांदीच्या दरातही मोठी वाढ दिसून येत आहे. चांदी ६०० रुपयांनी महागली असून ७८ हजार रुपये किलोवर पोहोचली आहे. पूर्वी ती ७७ हजार ४०० रुपये होती. या महिन्यात आतापर्यंत सोने २ हजार २०० रुपयांनी तर चांदी ५ हजार ४०० रुपयांनी महागली आहे.