दहशत कायम ठेवण्यासाठी काहीही! सलाम न केल्यामुळे संतप्त झालेल्या गुंडाने युवकावर केला चाकूहल्ला

नागपूर : सलाम न केल्यामुळे संतप्त झालेल्या गुंडाने एका तरुणाला चाकूने भोसकून गंभीर जखमी केले. गोपाल विजय देशकरी (२५) रा. सहयोगनगर असे जखमीचे नाव आहे.

बलात्काराच्या दोन घटनांनी हादरली उपराजधानी; फेसबूक फ्रेंड आणि शादी डॉटकॉमच्या ओळखीचा प्रताप 

शनिवारी दुपारी चारच्या सुमारास ही घटना घडली. घटनेच्या वेळी जखमी गोपाल हा त्याचा मित्र धीरज पंचारियासोबत पाटणकर चौकातील अजय पान शॉपजवळ बसला होता. त्यावेळी तेथे गोपालच्या ओळखीचा कुणाल उर्फ रायडर कृष्णा खडसे (२२) अंगुलीमालनगर हा तेथे आला. 

कुणालला पाहून गोपालने त्याला त्याचे नाव घेऊन आवाज दिला. त्यामुळे कुणालला राग आला. ‘तू मला सलाम का केला नाही’ असे बोलून कुणाल व त्याच्यासोबत असलेल्या दोन विधी संघर्षग्रस्त मुलांनी गोपालला हातबुक्कीने मारहाण केली. एवढ्यावरच कुणालचे समाधान झाले नाही तर त्याने चाकू काढून गोपालच्या गळ्यावर मारण्याचा प्रयत्न केला. 

...अन् नागपुरात अचानक बंद झाली लसीकरणाची नोंदणी; केंद्रांवर आरोग्यसेवकांचा गोंधळ 

गोपालने वार चुकविल्याने तो वार त्याच्या डाव्या डोळ्याजवळ लागून तो जखमी झाला. याप्रकरणी कपिलनगर पोलिसांनी गुन्हा नोंदवून कुणाल या गुंडास अटक केली. कुणाल हा कुख्यात गुंड असून त्याच्याविरोधात कपिलनगर पोलिस ठाण्यात ४ गुन्हे दाखल आहेत. मागील महिन्यात तो ३०७च्या एका प्रकरणातून कारागृहातून जामीनावर आल्याची माहिती आहे.