Bhandara : शिपायाने चोरले रिव्हॉल्व्हरसह काडतूस

भंडारा : कर्जबाजारीपणाला वैतागून एका पोलिस शिपायाने सावकाराला धाक दाखविण्यासाठी भंडारा न्यायालयाच्या पोलिस गार्ड रूममधून शनिवारी (ता. २९) चक्क रिव्हॉल्व्हर व ३५ काडतूस चोरल्याचा धक्कादायक प्रकार उघडकीस आला. याप्रकरणी भंडारा पोलिसांनी आरोपी पोलिस शिपायास रविवारी (ता. ३०) रात्री अटक केली. नीलेश खडसे (रा. गणेशपूर) असे अटकेतील आरोपीचे नाव आहे.

नीलेश भंडारा जिल्हा व सत्र न्यायालयात मुद्देमाल व हिफाजत कक्षात कर्तव्यावर होता. घटनेच्या दिवशी शनिवारी आरोपी नीलेशची ड्यूटी नसताना तो गार्ड रूममध्ये बॅग घेऊन आला व पाच मिनिटे थांबून शस्त्रांची तपासणी करून बॅगसह निघून गेला. दरम्यान, सहायक फौजदार सुनील सायम यांच्या नावाने असलेली ०.३८ रिव्हॉल्व्हर आणि ९ एमएमचे ३५ काडतूस शनिवारी चोरून नेले.