इटली येथे होणाऱ्या समर स्कूलसाठी बोधी रामटेके यांची निवड

चामोर्शी - युनिव्हर्सिटी ऑफ ट्युरीन, इटली येथे ४ ते ८ जुलै २०२२ रोजी आयाेजित जागतिक स्तरावरील समर स्कूलसाठी गडचिरोली जिल्ह्यातील अॅड. बोधी रामटेके यांची निवड झाली आहे. भारतातील आदिवासी समाजाचे प्रश्न व रचनात्मक कायदेशीर काम या विषयी बोधी रामटेके प्रकाश टाकतील.

चारदिवसीय जागतिक विचारमंथनात आदिवासी हक्क, त्यांची लोकशाही मूल्यांवर आधारीत सामाजिक व न्यायिक स्वतंत्र व्यवस्था, आदिवासी संस्कृती-कला, अशा अनेक विषयांवर चर्चा होणार आहे. जगातील नामांकित लंडन स्कुल ऑफ इकॉनॉमिक्स, युनिव्हर्सिटी ऑफ ससेक्स, युनिव्हर्सिटी ऑफ अँमस्टरडम, स्टॉकहोम्स युनिव्हर्सिटी येथील मान्यवर मागदर्शक म्हणून उपस्थित असतील.

जगभरातील विद्यार्थी व तज्ज्ञ यात उपस्थित असतील. त्यात गडचिरोली जिल्ह्यातील बोधी रामटेके यांची निवड होणे ही अत्यंत भूषणावह बाब आहे. दुर्गम भागातील आदिवासी समाजाचे मूलभूत प्रश्न सोडविण्यासाठी संविधानिक उपाययोजनांचा वापर करत पाथ फाउंडेशन ३ वर्षापासून कार्यरत आहे. या विधायक कामात अजून गती आणण्यासाठी या समर स्कूलमधील विचारमंथनाचा फायदा होईल, असे अॅड. बोधी रामटेके यांनी सांगितले.