Nagpur News : समीर जोशी यांना अखेर साडेनऊ वर्षानंतर जामीन

नागपूर : दामदुप्पट नफ्याचे आमिष दाखवून शहर तसेच विदर्भातील शेकडो लोकांना गंडविल्याचा आरोप असलेले श्री सूर्या कंपनीचे मालक समीर जोशी यांना अखेर साडेनऊ वर्षानंतर जामीन मिळाला आहे.

त्याच्यावर दाखल असलेल्या सर्वच प्रकरणांमधून त्यांना जामीन मिळाला आहे. लवकरच ते कारागृहातून बाहेर येतील अशी माहिती प्राप्त झाली आहे. श्री सूर्या कंपनीचे संचालक म्हणून त्यांनी अनेकांना दामदुप्पट नफ्याचे आमिष दाखविले. त्याबदल्यात त्यांच्याकडून कोट्यवधी रुपये घेतल्याचा आरोप त्यांच्यावर लावण्यात आला आहे.

या आरोपांखाली त्याच्यावर विविध गुन्हे दाखल करण्यात आले होते. या गुन्ह्यांमध्ये २०१३ मध्ये त्यांना अटक करण्यात आली. या घोटाळ्यानंतर शहरातील या प्रकारचे अनेक घोटाळे समोर आले. यातील सर्वच आरोपींवर गुन्हे दाखल करून त्यांना अटक करण्यात आली. पुढे सगळ्यांचीच जामिनावर सुटकाही झाली. समीर जोशींच्या पत्नीचीही जामिनावर सुटका झाली होती. मात्र, जोशींना जामीन मिळालेला नव्हता. अखेर. तब्बल साडे नऊ वर्षांनंतर त्यांना जामीन मिळाला आहे.