Karhandla Tiger Safari : कऱ्हांडला येथील सहा चालक, सहा गाइड निलंबित एफ-२ वाघिणीला घेरणे भोवले

नागपूर : उमरेड - पवनी - कऱ्हांडला वन्यजीव अभयारण्यातील गोंठणगाव गेटजवळ एफ-२ वाघीण आणि तिच्या चार पिल्लांना घेरल्या प्रकरणी वन विभागाने सहा सफारी चालक आणि सहा गाइड अशा १२ कर्मचाऱ्यांवर सहा महिन्यांची बंदी घातली आहे.

२७ सप्टेंबर रोजी सकाळी ७.४५ वाजता हा प्रकार घडल्याचे सांगण्यात येते. सफारी वाहनांनी वाघीण व तिच्या पिल्लांना गराडा घालून त्यांच्या मुक्त संचारात अडथळा आणल्याचा ठपका ठेवण्यात आला आहे.

३० सप्टेंबर रोजी कर्मचाऱ्यांवरील कारवाईसंदर्भातील आदेश काढण्यात आला. त्यानुसार या कर्मचाऱ्यांवर १ ऑक्टोबर २०२६ ते मार्च २०२७ या कालावधीसाठी बंदी घालण्यात आली आहे.

कारवाई झालेले गाइड व चालकांनी आरोप फेटाळले असून, आपण निर्दोष असल्याचा दावा केला आहे. मात्र संबंधीत गाईड आणि चालकांना त्यांची बाजू मांडण्याची संधी वनअधिकाऱ्यांनी दिली, असताना कारवाई झालेल्यांनी एफ-२ वाघीण पाहत असताना चूक झाल्याचे मान्य केले.

त्यामुळे त्यांच्यावर कारवाई करण्यात आल्याचे पेंचचे उपसंचालक अक्षय गजभिये यांनी सांगितले. कारवाईत गाईड, चालकांसह बारा ते पंधरा जणांवर कारवाई झाल्याची माहिती आहे.