दिवाळीत रुग्णांसाठी व्हेज पुलावसह वेगळा मेनू; आहारात बदल

नागपूर : मेडिकलमधील रुग्णांना दररोज भाजी-पोळी आणि वरण-भात हा आहार मिळतो. अविरत अन्नसेवा किंवा जेवणाची सुविधा मिळतेच. मात्र, दिवाळीच्या पार्श्वभूमीवर घरोघरी मिष्ठान्नासोबत सण साजरा होत असताना उपचाराधीन रुग्णांना साध्या आहारावरच समाधान मानावे लागते. यामुळे यंदा लक्ष्मीपूजनाच्या दिवशी व्हेज पुलाव, सेवया खीरसोबतच मिष्टान्नभोजन मिळणार आहे.

कोरोनामुळे अनेक जण बाधित होऊन रुग्णालयात दाखल झाले. रुग्णांना प्रोटिन्सयुक्त आहार मिळावा यासाठी वैद्यकीय अधीक्षक कार्यालयाच्या पुढाकाराने रुग्णांच्या आहारात अंडी देण्यात आली. आता दिवाळीच्या पार्श्वभूमीवर आहारात बदल करण्याचा निर्णय घेण्यात आला. चपातीसह व्हेज पुलाव, कढी, आलू सोले भाजी, खीर तर मधुमेह असलेल्या रुग्णांसाठी विशेष प्रकारचे भजे आहारात देण्याचा निर्णय मेडिकलचे अधिष्टाता डॉ. सुधीर गुप्ता आणि वैद्यकीय अधीक्षक डॉ. अविनाश गावंडे यांनी घेतला. व्हेज पुलावसह वेगळा मेनू जेवणात देऊन रुग्णांमध्ये आनंदी, सकारत्मक वातावरण निर्मिती करण्याचा प्रयत्न आहे.

मेडिकलमध्ये ग्रामीण भागातील रूग्ण मोठ्या संख्येने उपचार घेतात. गरीब रुग्णांना मेडिकलमधील आहाराशिवाय पर्याय नसतो. काही रुग्णांचे घर दूर असल्याने त्यांनाही दिवाळीचा आनंद उपभोगता यावा हेतू असल्याचे प्रशासनाने सांगितले. एक हजार ते बाराशे रुग्ण मेडिकलमध्ये दाखल असतात. दिवाळीच्या दहा दिवसांसाठी हा मेन्यू असावा असा सूर कर्मचाऱ्यांमध्ये उमटला आहे.