Nagpur Bike Theft: स्वतःचे वाहन पार्किंगमध्ये लावून दुचाकीची करायचे चोरी, २२ वाहने चोरणारी टोळी गजाआड

Nagpur Vehicle Theft: स्वतःचे वाहन पार्किंगमध्ये लावून बनावट चावीने दुसऱ्याचे वाहन चोरून नेत मध्यप्रदेशात विक्री करणाऱ्या तिघांना धंतोली पोलिसांनी अटक केली. त्यांच्याकडून २२ वाहने जप्त केली.

अतुल शामलाल बिसेन, सौरभ दिलीप मासुरकर आणि सोनू ऊर्फ ऋषभ दिलीप मासुरकर (सर्व रा. बालाघाट, मध्य प्रदेश) अशी आरोपींची नावे आहेत. पोलिसांनी दिलेल्या माहितीनुसार, धंतोली पोलिस ठाण्याच्या हद्दीतील पार्किंगच्या ठिकाणावरून दुचाकी चोरीला जात असल्याच्या तक्रारी पोलिसांकडे आल्या. त्यामुळे पोलिसांनी परिसरातील सीसीटीव्ही तपासले असता, काही जण दुचाकी लावून दुसऱ्या दुचाकी चोरून नेत असल्याची बाब समोर आली.

त्यामुळे पोलिस उपायुक्त राहुल मदने यांच्या मार्गदर्शनात सहायक पोलिस आयुक्त सुधीर नंदनवार यांच्या मार्गदर्शनाखाली वरिष्ठ पोलिस निरीक्षक विनायक कोळी, सहायक पोलिस निरीक्षक संकेत चौधरी, पोलिस हवालदार सुभाष वासाडे, शिपाई बाळू जाधव, अंमलदार विनोद चव्हाण, हरीश कामडी, माणिक दहिफळे, वृषभ निशितकर, विक्रम ठाकूर यांनी सोमवारी अतुल बिसेन याला अटक केली. तो सौरभ आणि ऋषभ यांच्या मदतीने चोरी केलेल्या वाहनांची विक्री करीत असल्याची माहिती समोर आली. पोलिसांनी त्यांच्याकडून २२ दुचाकी वाहने जप्त केली.

पोलिस आयुक्तांकडून सन्मान

धंतोली पोलिसांकडून करण्यात आलेल्या कामगिरीबद्दल पोलिस आयुक्त डॉ. रवींद्रकुमार सिंगल यांनी सत्कार केला. यावेळी धंतोली ठाण्याचे वरिष्ठ पोलिस निरीक्षकांसह अंमलदार यांना बोलावून घेत, त्यांना पुष्पगुच्छ व प्रमाणपत्र देण्यात आले.