सुरुवातीला भाजपचा उमेदवार विजयी झाल्याचं सांगितलं गेलं आणि १० मिनिटांनी निकाल बदलल्याचं समोर आलं.
नागपूरसह काही जिल्ह्यातील जिल्हा परिषदेच्या आणि पंचायत समितीच्या पोटनिवडणुका झाल्या. त्याची मतमोजणी आज सुरु असून काही धक्कादायक असे निकालही हाती येत आहेत. नागपूरमध्ये नगरखेड पंचायत समितीत राज्याचे माजी गृहमंत्री अनिल देशमुख यांना धक्का बसला आहे. तर दवलामेटीमध्ये सुरुवातीला भाजपचा उमेदवार विजयी झाल्याचं सांगितलं गेलं आणि १० मिनिटांनी निकाल बदलल्याचं समोर आलं. यात काँग्रेसच्या उमेदवाराने बाजी मारत १० मतांनी निवडणूक जिंकली.
दवलामेटीमध्ये अटीतटीची अशी लढत झाली. यामध्ये काँग्रेसच्या सुलोचना ढोक यांनी अवघ्या १० मतांनी विजय मिळवला. त्यांनी भाजपच्या ममता जैस्वाल यांना पराभूत केलं. तर तिसऱ्या क्रमांकावर वंचितच्या मंगला कांबळे या राहिल्या.
सुलोचना ढोक आणि ममता जैस्वाल यांच्यात काट्याची टक्कर सुरु होती. यातच सुरुवातीला भाजपच्या ममता जैस्वाल जिंकल्याचं सांगण्यात येत होतं. मात्र दहा मिनिटांनी काँग्रेसच्या सुलोचना ढोक विजयी झाल्याचं जाहीर करण्यात आल्यानं काँग्रेस कार्यकर्त्यांनी जल्लोष केला.
काँग्रेसच्या विजयी उमेदवार सुलोचना ढोक यांना २१६१ मते मिळाली. भाजपच्या ममता जैस्वाल यांना २१५१ मते मिळाल्यानं त्यांचा निसटता पराभव झाला. तर वंचितच्या उमेदवार मंगला कांबळे यांनी २ हजार ६४ मते मिळवली.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.