Nagpur : मध्यस्थी केली, अन् जीव गमावून बसला

टाकळघाट : क्षुल्लक कारणावरून दोन गटात भांडणाला सुरुवात झाली. वृद्ध भांडण सोडविण्यासाठी गेला आणि एका गटाने त्यांनाच मारहाण केली. या मारहाणीत त्या वृद्धाचा मृत्यू झाला. या प्रकरणात सात जणांना अटक करण्यात आली असून ही घटना एमआयडीसी बुटीबोरी पोलिस ठाण्याच्या हद्दीतील सालईधाबा नजीकच्या गवळी वस्ती येथे रविवारी (ता.२८) रात्री ८.३० वाजताच्या सुमारास घडली.

जेठा मेर (६७, गवळी बेळा, सालईधाबा, ता. हिंगणा) असे मृताचे तर दशरथ वरठी (४०), श्रावण वरठी (४०), अतुल दुर्वे (३७), राजेश कोहळे (३५), रामकृष्ण राऊत (३८), ज्ञानेश्वर डेरकर (३४, सर्व रा. पोही, ता. हिंगणा) व नीलेश सलामे (३५, रा. सालईधाबा, ता. हिंगणा) अशी अटक करण्यात आलेल्या आरोपींची नावे आहेत. पोही येथील मनीष वरठी हा रविवारी रात्री सालईधाबा येथील गवळी वस्तीवर आला होता.

त्यावेळी गोपाळ राठोड (१९) याचे काका लाला मेर यांनी मनीषला तू इतक्या रात्री येथे काय करतोस, अशी स्वाभाविक विचारणा केली. त्यावर चिडलेल्या मनीषने शिवीगाळ करायला सुरुवात केली. त्यामुळे लाला मेर यांनी मनीषला एक थप्पड मारली. त्यावर मनीष तुला बघून घेईन, असे म्हणत तिथून निघून गेला. काही वेळाने मनीष त्याच्या काही साथीदारांना घेऊन गवळी वस्तीवर आला. त्या सर्वांनी लाला मेर यांच्याशी भांडण उकरून काढत त्यांना मारहाण करायला सुरुवात केली. त्यातच जेठा मेर हे मध्यस्थी करायला व भांडण सोडवायला मध्ये गेले. मात्र, आरोपींनी त्यांनाही जबर मारहाण केली. यात गंभीर दुखापत झाल्याने ते खाली कोसळले. यात जेठा मेरा यांचा मृत्यू झाल्याने पोलिसांनी खुनाचा गुन्हा नोंदवून सात आरोपींना लगेच ताब्यात घेत अटक केली. याप्रकरणी एमआयडीसी बुटीबोरी पोलिसांनी गुन्हा नोंदवून तपास सुरू केला आहे.

पोलिसांच्या मदतीने मोठी घटना टळली

नागरिकांनी या घटनेची माहिती पोलिसांना दिल्याने ठाणेदार अशोक कोळी त्यांच्या सहकाऱ्यांसह तातडीने घटनास्थळी दाखल झाले. त्यावेळी जेठा मेरा जखमी अवस्थेत खाली कोसळले होते. पोलिसांनी जेठा मेरा यांना लगेच बुटीबोरी येथील रुग्णालयात आणले. तिथे डॉक्टरांनी तपासणीअंती त्यांना मृत घोषित केले. दुसरीकडे, पोलिसांनी दोन्ही गटातील म्होरक्यांची समजूत काढून भांडण तात्पुरते मिटवले. त्यामुळे दोन गटातील मोठी घटना टळली.