नागपूर : दमदार पावसाने नागपूरकर सुखावले

नागपूर : चार दिवसांपूर्वी मॉन्सूनचे विदर्भात आगमन झाले खरे. मात्र अपेक्षेप्रमाणे धुवाधार न बरसल्याने सर्वांचीच घोर निराशा झाली. मात्र उशिरा का होईना वरुणराजाने सोमवारी दणक्यात हजेरी लावल्याने नागपूरकर चांगलेच सुखावले. सायंकाळी साडेसातच्या सुमारास विजांचा कडकडाट व मेघगर्जनेसह कोसळलेल्या जोरदार पावसाने अख्खे शहर धुऊन काढले. हवामान विभागाने तीन-चार यलो अलर्ट दिल्याने विदर्भात आणखी पाऊस अपेक्षित आहे.

गेल्या काही दिवसांपासून उपराजधानीवर काळेकुट्ट ढग जमा होत आहेत. दमदार पावसाने नागपूरकर सुखावले मात्र पाऊस दांडी मारायचा. सोमवारीही दुपारी काही भागांत हलक्या सरी बरसल्यानंतर पुन्हा ऊन पडले. वरुणराजाचा लपंडाव सुरू असताना साडेसातच्या सुमारास अचानक वादळ सुटून धो-धो पावसाला सुरवात झाली. जवळपास तास दीड तास शहरात सर्वत्र मेघगर्जनेसह जोरदार पाऊस बरसला. पावसामुळे वाहनधारकांसह सर्वसामान्य नागरिकांची चांगलीच तारांबळ उडाली. पावसापासून बचाव करण्यासाठी अनेकांना आडोसा शोधावा लागला. तर अनेकांना ओल्या शरीराने घर गाठावे लागले. पावसामुळे रस्त्यांवर जागोजागी पाणी साचले होते. त्यामुळे रेनकोट व छत्र्याही बाहेर पडल्या. काही भागांत बत्तीही गुल झाली.

मात्र त्याउपरही नागपूरकरांनी यंदाच्या पहिल्याच दमदार पावसाचा आनंद घेतला. पावसामुळे वातावरणात गारवा निर्माण होऊन चार महिन्यांपासून गरगरा फिरणारे पंखे व कुलरही थंडावले. शहरात रात्री साडेआठपर्यंत ११.६ मिमी पावसाची नोंद करण्यात आली. विदर्भात पुढील तीन-चार दिवस यलो अलर्ट असल्यामुळे या आठवड्यात वरुणराजा आणखी बरसण्याची दाट शक्यता आहे. आजच्या पावसामुळे बळीराजाही सुखावला आहे. त्यामुळे पेरण्याचीही लगबग वाढणार आहे.