नागपूर : खाट उपलब्ध नसल्याने शासकीय रुग्णालयातून परत घरी नेले. कारण खासगी रुग्णालयातील उपचाराचा खर्च करणे शक्य नव्हते. अखेर या कोरोनाबाधित महिला रुग्णाचा घरीच मृत्यू झाला. शव नेण्यासाठी महानगरपालिकेला फोन केला. पण दिघोरी हा भाग आमच्या हद्दीत येत नसल्याचे सांगितल्याने अखेर नातेवाइकांनीच अंत्यसंस्कार उरकले.
कोरोनाबाधितांवरील उपचारासाठी खासगीत मोठ्या प्रमाणात पैशाची गरज आहे. त्यात मेडिकल, मेयोत खाटा फुल्ल आहेत. यामुळे नाइलाजास्तव कोरोनाबाधित घरीच उपचार घेत आहेत. दिघोरी येथील श्री साईनगर येथील रहिवासी असलेल्या ज्योती मुर्साकर यांचा कोरोना संसर्गाने मृत्यू झाला. मृतक महिलेचा मुलगा लोकेश मुर्साकर यांनी दिलेल्या माहितीनुसार १७ एप्रिल रोजी सीटी स्कॅन करण्यात आले. ज्यात मोठ्या प्रमाणात संसर्ग झाल्याचे दिसून आले. यानंतर उपचारासाठी रूग्ण महिलेस मेडिकल आणि मेयोत नेले. मात्र, खाटा शिल्लक नसल्याचे सांगण्यात आले. खासगी रुग्णालयात ८० हजार रुपये भरा असे सांगण्यात आले. पैसे नसल्यामुळे अखेर आईला घरीच ठेवले होते. मानकापूर येथील डॉक्टरांकडून उपचार मिळवा, ऑक्सिजनची गरज भासल्यास सिलेंडर घरी आणा. मात्र, सिलिंडरही मिळाले नाही. यानंतर त्याची प्रकृती दिवसेंदिवस खालावली. अखेर त्यांचा मृत्यू झाला.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.