नागपूर : मंगळवारी २२ जलकुंभावरून पाणी बंद

नागपूर : अमृत योजनेंतर्गत गिट्टीखदान येथे तयार करण्यात आलेल्या जलकुंभाला जलवाहिनी जोडण्यात येणार आहे. ही कामे येत्या ३१ मे रोजी करण्यात येणार असल्याने २२ जलकुंभातून पाणीपुरवठा बंद राहणार आहे. या कामाचा चार झोनमधील वस्त्यांना फटका बसणार आहे.

पश्चिम नागपुरातील रामदेवबाबा टेकडी परिसरात नवे जलकुंभ बांधण्यात आले आहे. या जलकुंभाला पाणीपुरवठ्यासाठी १२०० मिलिमीटर जलवाहिनीवरून नवीन जलवाहिनी जोडण्याचे काम ३१ मे रोजी सकाळी १० वाजतापासून सुरू होणार आहे. ही कामे १ जूनला सकाळी १० वाजेपर्यंत सुरू राहील. त्यामुळे महापालिका व ओसीडब्लूने एका दिवसाचे ‘शटडाऊन’ घेतले आहे. त्यामुळे धरमपेठ, लक्ष्मीनगर, हनुमाननगर मंगळवारी झोनमधील २२ जलकुंभाचा पाणीपुरवठा बंद राहणार आहे.

या जलकुंभावरून पाणीपुरवठा बंद राहणार

• धरमपेठ झोन : सेमिनरी हिल, रामनगर, रायफल लाईन,

• फुटाळा लाईन जलकुंभ

• लक्ष्मीनगर झोन : गायत्रीनगर, प्रतापनगर, खामला, त्रिमूर्तीनगर, टाकळी सिम, जयताळा, लक्ष्मीनगर (नवीन) जलकुंभ

• हनुमान नगर झोन : चिंचभवन, नासुप्रचे जलकुंभ.

• मंगळवारी झोन: गिट्टीखदान, दाभा जलकुंभ, टेकडीवाडी जलकुंभ