राज्यातही बर्डफ्लू? नागपूर जिल्ह्यातील कोंढाळीत मोठ्या संख्येत आढळले मृत पक्षी; नमुने तपासणार

कोंढाळी (जि. नागपूर) :  कोंढाळी या भागातील रिगणाबोंडी, मिनीवाडा, मसाळा, चाकगेडोह आदी भागात गेल्या काही दिवसांपासुन पोपट, चिमण्या, कावळे, जंगली कबुतर अशा पक्ष्यांचा मोठया संख्येत अज्ञात रोगाने मृत्यु होत आहे. रिगणाबोडी येथे तर झाडाखाली मृत पोपटांचा सडा पडला आहे. 

नक्की वाचा - अनेक दिवसांपासून बंद असलेल्या घराचं शेजाऱ्यांनी उघडलं दार; पलंगाजवळील दृश्य बघून भल्याभल्यांचा उडाला थरकाप 

रिगणाबोडी येथील पोलिस पाटील संजय नागपुरे  यांनी रिगणाबोडी भागात  मोठ्या संखेत पोपटांचा मृत्यु झाल्याची माहिती कोंढाळीचे  ठाणेदार विश्वास फुल्लरवार यांना दिली. या घटनेची माहिती मिळताच ठाणेदार विश्वास फुल्लरवार यांनी काटोलचे तहसीलदार अजय चरडे  यांना माहिती दिली. काटोलचे तालुका पशुधन अधिकारी व कोंढाळीचे प्रभारी पशुधन विकास अधिकारी डॉ.तुषार पुंड व सुधिर कापशीकर रिगणाबोंडी भागात गेले.  झाडांखाली जाऊन निरिक्षण केले. 

तिथे मृत पक्ष्यांचा खच पडला होता. डॉ.तुषार पुंड यांनी जिल्हा पशुसंवर्धन उपायुक्त डॉ.मजुषा पुंडलिक व प्रभारी  जिल्हा पशुसंवर्धन अधिकारी डॉ.युवराज केने यांना माहिती दिली  जिल्हास्तरीय प्रयोग शाळेतील चमु नागपुर येथुन  रिगणाबोडी कडे रवाना झाली.पशुसंवर्धन उपायुक्त मंजुषा पुंडलिक व प्रभारी जिल्हा पशुसंवर्धन अधिकारी डॉ.युवराज केने  नागपूर जिल्हा सर्व पशु चिकित्सालय चे प्रमुख डॉ.उन्मेश हिरूडकर,काटोल येथील तालुका लघु पशु सर्व चिकित्सालय डॉ.निरंजन शेटे   मृत पक्ष्यांचे नमुने गोळा केले.

अधिक वाचा - एकाचवेळी पाच बालकांना हातात घेऊन शूर परिचारिकेची आगीतून धाव, मेयोमधील घटनेची अनेकांना आठवण

या पक्ष्यांचा मृत्यु कशामुळे झाला हे स्पष्ट करण्याकरीता हे नमुने भोपाळ येथील राष्ट्रीय वायरस प्रयोगशाळेत पाठविण्यात येणार आहे कारण राज्यात बर्ड फ्लु वायरस शोधणारी प्रयोगशाळा नसल्याने हे सर्व मृत पक्ष्यांचे नमुने भोपाळ येथे पाठवावे लागणार आहेत अशी माहिती पशुसंवर्धन उपायुक्त मंजुषा पुढलिक यांनी दिली. त्यामुळे आता अहवाल आल्यानंतरच पक्ष्यांचा मृत्यू बर्ड फ्लूमुळे झाला की नाही हे स्पष्ट होईल. 

संपादन - अथर्व महांकाळ