- अखिलेश गणवीर
नागपूर : खासगी ट्रॅव्हल्सची मक्तेदारी मोडीत काढण्यासाठी राज्य मार्ग परिवहन महामंडळ (एसटी)ने कंबर कसली आहे. राज्यातील पहिली स्लीपर (शयनयान)बसची निर्मिती दापोडी मध्यवर्ती कार्यशाळेत पूर्ण झाली आहे.
एकूण ५० बसेस काही दिवसात तयार होणार आहेत. त्यातून नागपूर विभागाला ४ बसेस मिळणार असून नागपूर-पुणे ही बस धावणार आहे. त्यामुळे प्रवाशांना रात्रीचा प्रवास आता एसटीमध्ये झोपून करता येईल.
एसटी महामंडळाने लांब पल्ल्यासाठी खास स्लीपर बसची निर्मिती केली आहे. नागपुरातून पुणे, हैदराबाद, छत्रपती संभाजीनगर, इंदौर, शेगाव, आदिलाबाद, अंबेजोगाई आदी लांब पल्ल्याच्या गाड्या चालतात. नागपूर-पुणे ही सर्वात व्यस्त चालणारी बस आहे.
या मार्गावर शिवशाहीच धावते. नागपूरवरून पुण्याला जाणाऱ्यांची संख्या मोठी आहे. वेळेवर रेल्वेचे तिकीट आरक्षित होत नसल्याने प्रवासी खासगी ट्रॅव्हल्सकडे वळतात. खासगीच्या तुलनेत एसटीचे तिकीट स्वस्त असल्यास प्रवासी आता एसटीकडे वळतील असा विश्वास महामंडळाला आहे.
भाडे बाराशे रुपये राहण्याची शक्यता
शिवशाहीचे भाडे नागपूर-पुणे १६०० रुपये आहे. खासगी ट्रॅव्हल्स चालक हंगामानुसार भाडे वाढवितात. त्याचा फटका प्रवाशांना बसतो. मात्र, एसटीच्या स्लीपर बसचे भाडे एकच राहील. ते साधारण १२०० रुपये राहण्याची शक्यता वर्तविण्यात येत आहे. ही गाडी विनावातानुकूलीतही असणार आहे.
हैदराबाद मार्गावरही धावणार !
सुरुवातीला नागपूर-पुण्याकरिता ४ स्लीपर बसची मागणी महामंडळाच्या नागपूर विभागाने मुख्यालयाला पत्रातून केली आहे. येत्या महिनाभरात ४ गाड्या विभागात दाखल होतील. असा विश्वास अधिकाऱ्यांनी व्यक्त केला आहे. त्यानंतर हैदराबादसह इतरही लांब पल्ल्यावर या गाड्या चालविल्या जातील.
स्लीपर (शयनयान) बसची वैशिष्ट्ये
एकूण ३० प्रवासी झोपून प्रवास करू शकतात.
गाडीला हवेचा अवरोध कमी होण्यासाठी एरोडायनामिक आकार.
बस १२ मीटर लांब, २.६ मीटर रुंद आणि ३.६ मीटर उंच
एलईडी मार्गफलक, रिव्हर्सिंग कॅमेरा, लगेजकरिता दोन सामान कक्ष
आपत्कालीन दरवाजा, खिडकी तोडण्यासाठी पुरेसे हातोडे.
अनाउन्सिंग सिस्टीम, मोबाईल चार्जिंग सुविधा, ते ठेवण्यासाठी पाऊच.
पुश बॅक सीट, प्रत्येक बर्थमध्ये वाचनासाठी रीडिंग व नाईट लॅम्प.
स्लीपर एसटी बसचा आरामदायक प्रवास असणार आहे. याचे भाडे नीम आरामच्या बरोबरीचे व शिवशाही पेक्षा कमी राहील. लवकरच नागपूर विभागाला या ४ गाड्या मिळणार आहेत.
- श्रीकांत गभने, उपमहाव्यवस्थापक- नागपूर व अमरावती विभाग (एसटी महामंडळ)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.