अद्दा आणि पव्व्याने उडवली गावकऱ्यांची झोप; पोलिस प्रशासन कुंभकर्णी झोपेत

मोवाड (जि. नागपूर):  शहरात अनेक ठिकाणी अवैध देशी दारूविक्रीला जोर आला आहे. पोलिस प्रशासन कुंभकर्णी झोपेत असल्याने नागरिकांमध्ये असंतोषाचे वातावरण आहे. या ठिकाणी सायंकाळपान रात्री उशीरापर्यंत खुलेआम देशी दारूची अवैध विक्री केली जात आहे. 

परिणामी कामगार युवकांना दारूचे व्यसन जडले आहे. दारूला ग्राहकी चांगली असून आर्थिक उत्पन्नही बऱ्याच प्रमाणात मिळत असल्यामुळे अनेक बेरोजगार युवकांनी या व्यवसायात उडी घेतली आहे. मद्यपी मद्य प्राशन करून सार्वजनिक ठिकाणी गोंधळ घालत अर्वाच्य भाषेत शिवीगाळ करीत असल्यामुळे रस्त्याने ये-जा करणाऱ्या कामगारवर्ग व वाहनधारकांना मोठा त्रास सहन करावा लागत आहे. तक्रार देण्यास कुणीही पुढे येत नसल्यामुळे मद्यपीचा त्रास वाढला आहे.

अधिक वाचा - प्रेमासमोर जन्मदात्याचा विसर! 'प्लीज पप्पा, तक्रार नका देऊ न' असं म्हणत चाकूहल्ला करणाऱ्या मुलाची घेतली बाजू

व्यसनामुळे भांडणाचे प्रमाण वाढले असून व दारूची खुलेआम विक्री थांबविण्यासाठी कुणीही पुढाकार घेत नसल्यामुळे नागरिकांत नाराजीचा सूर उमटत आहे.

मोवाड हे नगरपरिषदेचे गाव आहे. येथील लोकसंख्या आजघडीला दहा हजाराच्या घरात असून येथे दोन शासकीय बार व दोन देशी दारू चिल्लर विक्रीची दुकाने आहेत. ही दुकाने आपल्या शासकीय वेळेत उघडतात व वेळेतच बंद होतात. तरी मात्र उशिरापर्यंत मद्यपींना दारू मिळते कुठून, हा चर्चेचा विषय आहे. विविध ठिकाणी दिवसभर मोलमजूरीने काम करून आलेले मजूर व कामगार दारूवरच खर्च करीत असतात. त्यामुळे अनेक संसार उघड्यावरच दिसत आहेत. खुलेआम दारूविक्री करणाऱ्यांची शहरात दहशत असल्यामुळे त्यांच्या विरोधात तक्रार करण्यास सर्वसामान्य नागरिक तयार होत नाही. त्यांच्यावर कार्यवाही करण्यास पोलिस कानाडोळा करीत असल्याचा आरोप नागरिकांनी केला आहे.

नक्की वाचा - आधी कापली हाताची नस, रुणालयात जाताना अचानक घेतली उडी अन् घडला थरकाप उडवणारा प्रसंग

शहरातील नागरिकांनी अवैध दारूविक्री थांबविण्यासाठी अनेक प्रसारमाध्यमांतर्गत संबधित विभागाकडे पाठपुरावा देखील केला. परंतु या उद्योगांनी पुन:श्च शहरात आपले डोके वर काढले असून पोलिस प्रशासनाच्या कार्यतत्परतेवर प्रश्नचिन्ह निर्माण केले आहे.

संपादन - अथर्व महांकाळ