esakal | ८० वर्षांच्या ज्येष्ठ नागरिकाने दिली कोरोनाला मात; कधीही पडले नाही घराबाहेर
sakal

बोलून बातमी शोधा

८० वर्षांच्या ज्येष्ठ नागरिकाने दिली कोरोनाला मात; कधीही पडले नाही घराबाहेर

८० वर्षांच्या ज्येष्ठ नागरिकाने दिली कोरोनाला मात; कधीही पडले नाही घराबाहेर

sakal_logo
By
नरेंद्र चोरे

नागपूर : एखाद्या व्यक्तीमध्ये प्रबळ इच्छाशक्ती व संयम असेल आणि त्याला प्रभावी उपचाराची जोड असेल तर तो व्यक्ती कोणत्याही गंभीर आजारावर सहज मात करू शकतो. ८० वर्षीय रत्नाकर राऊत यांच्यासह परिवाराने कोरोनाला हरवून ही बाब सिद्ध करून दाखविली. (The-80-year-old-senior-beat-Corona-virus)

महाराष्ट्र फेस्कॉम या ज्येष्ठ नागरिकांच्या संघटनेचे पूर्व विदर्भ सचिव असलेले राऊत यांनी गतवर्षी लॉकडाउन लागल्यापासून लसीकरणाचा अपवाद वगळता घराचा उंबरठादेखील ओलांडला नाही. मात्र, काळजी घेऊनही त्यांना कोरोनाची लागण झाली. दहा एप्रिल रोजी ताप, हातपाय दुखणे, खोकला व उलटीसारखी लक्षणे जाणवल्यानंतर डॉक्टरांच्या सल्ल्यानुसार त्यांनी कोरोनाची चाचणी केली, ज्यात रिपोर्ट पॉझिटिव्ह आला. त्यामुळे सावधगिरीचा उपाय म्हणून घरातील इतरही सदस्यांची चाचणी करवून घेतली. त्यात मुलगा हर्षवर्धन आणि सून प्राजक्ता यांनाही संसर्ग झाल्याचे आढळून आले, तर १३ वर्षांचा नातू अभिमोद निगेटिव्ह आला. त्यामुळे तिघेही ‘होम क्वारंटाइन’ होऊन उपचार सुरू केले.

हेही वाचा: Big News : रविवारपासून जीवनावश्‍यक दुकाने ‘अनलॉक’; १ जूनपर्यंत सूट

उपचार सुरू असतानाच अचानक एकेदिवशी मुलाची तब्येत बिघडली. श्वास घ्यायला त्रास होऊ लागल्याने खासगी रुग्णालयात भरती करण्यात आले. ऑक्सिजन लेव्हल कमी झाल्याने आयसीयूत शिफ्ट करावे लागले. डॉक्टरांनी शर्थीचे प्रयत्न करून हर्षवर्धनला संकटातून बाहेर काढले. घरी उपचार घेणारे राऊत व त्यांची सूनही कोरोनामुक्त झाले.

कोरोनामुळे २९ ऑगस्टला पत्नी मरण पावल्यानंतरही आम्ही घाबरलो नाही. पॉझिटिव्ह राहून आजाराचा धैर्याने सामना केला. मनात भीती न बाळगता डॉक्टरांच्या सल्ल्यानुसार नियमित उपचार, संतुलित आहार व दररोज व्यायाम व प्राणायाम केल्यास कोरोनाला सहज मात करता येऊ शकते, असे राऊत यांनी सांगितले.

हेही वाचा: फडणवीस यांचा इशारा, शेतकऱ्यांना वाऱ्यावर सोडल्यास आंदोलन करणार

कोरोना आल्यापासून कधीही घराबाहेर पडलो नाही. सरकारच्या गाईडलाइन्सचे काटेकोरपणे पालन केले. त्याउपरही कोरोनाची लागण झाली. पण एका क्षणासाठीही घाबरलो नाही. योग्य उपचार केल्यास कोरोनाला हरवू शकतो, असा मला विश्वास होता. कोरोनामुक्त झाल्याचा आनंद व समाधान आहे.
- रत्नाकर राऊत, ज्येष्ठ नागरिक

(The-80-year-old-senior-beat-Corona-virus)