कुटुंबाला बसला तीस लाखांचा दणका; गोव्याला फिरायला जाणे पडले महागात

नागपूर : एका कुटुंबाला गोव्याला फिरायला जाणे चांगलेच महागात पडले. चोरट्यांनी घरी कुणी नसल्याची संधी साधत कपाटात ठेवलेले हिरे, सोन्याचे दागिने व रोख ४७ हजार रुपये असा एकूण ३० लाख ४७ हजार रुपयांचा मुद्देमाल चोरून नेला. ही घटना सोनेगाव पोलिस ठाण्याच्या हद्दीत घडली.

पोलिसांनी दिलेल्या माहितीनुसार, सिमापुरम गुणशंकर रेड्डी (६१, रा. परफेक्ट हाउसिंग सोसायटी, पन्नासे ले-आउट) यांचा गोडाऊनचा व्यवसाय आहे. रेड्डी हे आपल्या कुटुंबासह तीन डिसेंबर रोजी घराला कुलूप लावून गोवा येथे गेले.

अधिक वाचा - २४ वर्षांपूर्वी रेल्वेस्थानकावर सापडलेल्या 'वर्षा'चं गृहमंत्री अनिल देशमुख करणार कन्यादान

घरी कुणी नसल्याची संधी साधत चोरट्यांनी दाराचे कुलूप तोडून आत प्रवेश केला. बेडरूममधील लाकडी आलमारीत ठेवलेले सोन्याचे दागिने, हिरे आणि रोख ४७ हजार रुपये असा एकूण ३० लाख ४७ हजार रुपयांचा मुद्देमाल चोरून नेला.

गोव्याच्या टूरवरून मंगळवारला परत आलेल्या रेड्डी कुटुंबाला सामान अस्ताव्यस्त पाहून घरी चोरी झाल्याचे लक्षात आले. त्यांनी आलमारी बघितली असता हिरे, सोन्याचे दागिने आणि रोख रक्कम आढळून आली. एवढा मोठा मुद्देमाल चोरी झाल्याने त्यांना मोठा धक्का बसला. सिमापुरम रेड्डी यांनी लगेच सोनेगाव पोलिसांत तक्रार दिली.

सविस्तर वाचा - बापरे! घराच्या मागेच लपून होता वाघ, सरपण आणायला जाताच महिलेवर केला हल्ला

पोलिसांनी दिलेल्या तक्रारीवरून घरफोडीचा गुन्हा दाखल केला आहे. चोरी झालेल्या मुद्देमालाचे गांभीर्य लक्षात घेऊन पोलिसांनी तपासाची चक्रे फिरवायला सुरुवात केली आहे. काही जणांची यात चौकशी झाल्याची माहिती आहे. घरावर पाळत ठेवणाऱ्यांनी हात साफ केला असावा, अशी शक्यता वर्तविण्यात येत आहे.

संपादन - नीलेश डाखोरे