Swine Flu : स्वाइन फ्लूने डोकं काढले वर; शहरात दोन मृत्यू उघड

नागपूर - कोरोनाचा प्रकोप थांबला असताना स्वाइन फ्लूने डोकं वर काढले आहे. उपराजधानीत ‘स्वाईन फ्लू’चे दोन मृत्यू झाल्याचे उघड झाले असून मंगळवारी (ता.९) महापालिकेच्या मृत्यू विश्लेषण समितीच्या (डेथ ऑडिट कमिटी) बैठकीत यावर शिक्कामोर्तब ले. हे दोन्ही मृत्यू हे शहरातील आहे. ही मनपाच्या आरोग्य विभागाची चिंता वाढवणारी बाब आहे.

मनपाच्या आरोग्य विभागात मंगळवारच्या बैठकीत ‘स्वाईन फ्लू’ने दगावलेल्या दोन्ही रुग्णांची सुक्ष्म माहिती घेण्यात आली. त्यांचे केसपेपर सादर करण्यात आले. यात ६० वर्षे वयोगटातील य रुग्णांना ‘स्वाईन फ्लू’ सोबत इतर सहव्याधी होत्या. दोन्ही मृत्यू ‘स्वाईन फ्लू’ने झाल्याचे शिक्कामोर्तब केले गेले. यात एक महिला आणि एक पुरुष होता.

१ जानेवारी २०२३ पासून नागपुरात स्वाईन फ्लू मृत्यू विश्लेषण समितीच्या तीन बैठका झाल्या. यात आतापर्यंत ४ स्वाईन फ्लूबाधितांचे मृत्यू झाल्याचे निदान मृत्यू विश्लेषनातून पुढे आले. त्यात तिघांच्या मृत्यूला स्वाईन फ्लू कारणीभूत असल्याचे समितीने प्रमाणित केले. तर एक मृत्यू इतर सहव्याधीने झाला.

आतापर्यंत १९ बाधित

१ जानेवारी २०२३ पासून शहरात इन्फल्युएंझा एच १ एन १ या आजाराचे एकूण १९ रुग्ण आढळले. त्यापैकी ४ रुग्ण नागपूर शहराबाहेरील होते. जानेवारी २०२३ मध्ये ८ रुग्ण, फेब्रुवारी २ रुग्ण, मार्च मध्ये ३, एप्रिल ४ व मे महिन्यात २ रुग्ण आढळले. या रुग्णांच्या घरी व परिसरात महापालिकेच्या आरोग्य विभागाने संपर्कातील व्यक्तीचा शोध घेतला. परिसरात फ्लू सदृश रुग्णांचे सर्व्हेक्षण केले.

मंगळवारी महापालिकेचे मुख्य वैद्यकीय अधिकारी डॉ. नरेंद्र बहिरवार यांच्या अध्यक्षतेखाली झालेल्या बैठकीला साथरोग अधिकारी डॉ. गोवर्धन नवखरे, मेयोच्या सुक्ष्मजीव शास्त्र विभागाचे डॉ. रविंद्र खडसे, डॉ. निलीमा वानखेडे, डॉ. शीतल मोहने उपस्थित होते.